Lögreglan í borginni Leipzig í Þýskalandi skaut tígrisdýr sem hafði sloppið frá eiganda sínum. Tígrisdýrið hafði ráðist á og sært alvarlega mann á áttræðisaldri.
Breska ríkisútvarpið BBC greinir frá þessu.
Lögreglunni í Leipzig, í austurhluta Þýskalands, barst tilkynning í gær, sunnudaginn 17. maí, um að tígrisdýr hefði sloppið frá eiganda sínum í bænum Schkeuditz, norðvestan við borgina.
Dýrið var í eigu konu sem heitir Carmen Zander, og kallar sig „Tígrisdrottninguna“, en hún starfar sem fjöllistamaður í sirkus. Dýrið sem slapp, var eitt af átta dýrum í eigu Zander.
Þegar lögreglan kom á staðinn, um klukkan 13:00, hafði dýrið ráðist á og stórslasað 72 ára gamlan mann. Engin áhætta var tekin og dýrið fellt samstundis með byssu.
Zander var á staðnum og náðust ljósmyndir af henni þar sem hún sat í bíl og grét, harmi slegin yfir atvikinu.
Lögreglan hefur hafið rannsókn á því hvernig dýrið komst úr prísund sinni. En ekkert hinna stóru kattardýranna slapp.
Thomas Druskat, bæjarstjóri, segir að atvikið sé óásættanlegt og að flytja ætti dýrin úr bænum. Þá hafa nágrannar sagt að aðbúnaður dýranna hafi lengi verið lélegur. Zander hefur ekki fengið að koma fram í fjögur ár, meðal annars vegna þess að búrin þykja allt of lítil.
