Erlendir aðilar sem reyna að hafa fé út úr Íslendingum hafa gripið til þess ráðs að nota talgervla við svikin til að tala íslensku við þá sem verið er að reyna að svíkja fé út úr.

Þetta kemur fram í tilkynningu frá lögreglunni á höfuðborgarsvæðinu.

Þar segir að í lengri tíma hafi verið í gangi fjársvik þess eðlis að hringt sé í fólk og á línunni sé aðili sem segist vera frá Microsoft og að eitthvað sé að tölvu þess sem hringt sé í. Í framhaldinu sé viðkomandi leiddur í gegnum ferli við uppsetningu búnaðar í tölvu sinni sem geri brotamönnum kleift að komast yfir fjármuni hans. Nú hafi sú breyting orðið á þessum svikum að bæði sé hringt úr íslenskum símanúmerum og notaður talgervill í samskiptunum. Þannig virðist símtalið koma frá Íslandi og íslenska sé töluð við þann sem reynt sé að svíkja.

Telji fólk sig hafa orðið fyrir svikum af þessu tagi og hafa tapað fjármunum er því bent á að hafa tafarlaust samband við sinn viðskiptabanka til að fá ráðgjöf og í framhaldinu tilkynna málið til lögreglu. Þá minnir lögregla á netbrotagáttina á island.is sem finna má undir „samfélag og réttindi“. Þar er bæði hægt að tilkynna netbrot til lögreglu sem og tilraunir til slíkra brota.