Mennta- og barnamálaráðherra hefur birt skýrslu um frammistöðu nemenda úr einstökum grunnskólum á lokaprófum í framhaldsskólum, en skýrslan var unnin að beiðni fráfarandi þingmanns Sjálfstæðisflokks og verðandi bæjarstjóra Reykjanesbæjar, Vilhjálms Árnasonar.
Fram kemur í skýrslunni að af þeim nemendum sem luku grunnskóla og hófu nám á almennri bóknámsbraut í framhaldsskóla árið 2021 hafi 58 prósent þeirra útskrifast þremur árum síðar, eða skólaárið 2023-2024. Tekið er fram að tilskilinn tími framhaldsskólanáms sé ekki skilgreindur í aðalnámskrá og að lengd náms fari eftir brautum, réttindum og hæfniþrepum sem viðkomandi nám er skilgreint út frá.
Upplýsingar um meðalárseinkunnir framhaldsskólanemenda liggja ekki fyrir í ráðuneytinu svo skýrslan byggir á upplýsingum um lokaeinkunnir framhaldsskólanemenda. Meðal annars birtist í skýrslunni yfirlit sem sýnir meðaleinkunnir úr einstökum grunnskólum árið 2021, en þarna er aðeins horft til einkunna þeirra nemenda sem fóru svo í framhaldsskóla og kláruðu á þremur árum. Með öðrum orðum vantar inn í þessa mælingu nemendur sem ekki fóru í framhaldsskóla, þá sem kláruðu á skemmri tíma en þremur árum og þá sem kláruðu á lengri tíma en þremur árum.
Meðaleinkunnir sem gefnar eru upp í töflunni hér að neðan byggja á bókstafseinkunnum í grunnskóla sem er breytt yfir í tölugildi á bilinu 1-4. Hæsta einkunn A fær tölugildið 4; B+ fær tölugildið 3,75; B fær tölugildið 3; C+ fær tölugildið 2,75; C fær tölugildið 2 og D fær tölugildið 1. Þessar meðaleinkunnir byggja ekki á samræmdu námsmati grunnskóla heldur námsmati einstakra skóla og eru því, að sögn ráðherra, ekki til þess fallnar að gera samanburð á námsárangri á milli skóla.
Eins má í skýrslunni sjá frammitstöðu nemenda tiltekinna grunnskóla á lokaprófi í framhaldsskóla, en þær tölur eru þó þeim galla haldnar að útskriftarárgangar grunnskóla eru misstórir og börnin enda svo með að dreifa sér á marga framhaldsskóla. Það eru helst safnskólarnir sem birtast í því yfirliti enda fara gjarnan margir nemendur úr þeim skólum í sama framhaldsskólann. Þar er má þó lesa áhugaverðar upplýsingar, svo sem að nemendur í Garðaskóla eru áberandi í Verzlunarskóla Íslands og Fjölbrautarskólanum í Garðabæ og nemendur úr Hagaskóla eru áberandi í Menntaskólanum í Reykjavík.
Í samantekt um skýrsluna kemur fram að einn helsti áhrifaþáttur á frammistöðu nemenda er menntunarstig og félagsleg staða foreldra.
Eins kemur fram í skýrslunni hversu margir nemendur sem útskrifuðust úr grunnskóla árið 2021 luku framhaldsskólanámi skólaárið 2023-2024. Þegar þetta er borið saman við heildarstærð árgangsins í hverjum skóla fyrir sig birtist töluverður munur á milli skóla. Sem dæmi luku 32 nemendur grunnskólanámi við Fellaskóla árið 2021 en aðeins 8 þeirra útskrifuðust úr framhaldsskóla skólaárið 2023-2024, eða um 25 prósent nemenda. Hjá Hagaskóla luku 206 nemendur 10. bekk árið 2021 og 148 þeirra luku framhaldsskóla skólaárið 2023-2024 eða tæp 72 prósent nemenda. Hjá Réttarholtsskóla luku 129 nemendur 10. bekk árið 2021 og 105 þeirra luku framhaldsskólanámi skólaárið 2023-2024 eða rétt rúmlega 81 prósent nemenda. Hjá Árbæjarskóla luku 105 nemendur 10. bekk árið 2021 og 63 þeirra útskrifuðust úr framhaldsskóla skólaárið 2023-2024 eða 60 prósent nemenda.
Hjá Kópavogsskóla luku 30 nemendur 10. bekk árið 2021 og af þeim útskrifuðust 20 úr framhaldsskóla skólaárið 2023-2024 eða tæp 67 prósent. Hjá Lindaskóla luku 51 nemandi 10. bekk árið 2021 og af þeim útskrifuðust 28 úr framhaldsskóla skólaárið 2023-2024 eða um 55 prósent.
