Arnar Þór Ingólfsson, verðlaunablaðamaður af Heimildinni, hefur hafið störf sem starfsmaður þingflokks Samfylkingarinnar samkvæmt vefsíðu Alþingis. Þar hittir Arnar Þór fyrir náinn samstarfsmann sinn, Þórð Snæ Júlíusson, sem nýlega tók við sem framkvæmdastjóri þingflokks Samfylkingarinnar.

Arnar Þór, sem er stjórnmálafræðingur að mennt, var ráðinn til netmiðilsins Kjarnans árið 2020 sem Þórður Snær ritstýrði og stofnaði ásamt viðskiptafélögum sínum. Kjarninn sameinaðist svo Stundinni, svo úr varð Heimildin, í árslok 2022 og þar starfaði Arnar Þór fram að vistaskiptunum yfir í pólitíkina.

Þórður Snær ritstýrði Heimildinni til fram til júlíloka á síðasta ári eftir harða valdabaráttu í yfirstjórn miðilsins. Skellti hann sér svo í framboð fyrir Samfylkinguna en í miðri kosningabaráttu komu rætin skrif hans á gamla bloggsíðu upp á yfirborðið og urðu þau til þess að hann lýsti því yfir að hann hyggðist ekki taka þingsæti ef hann myndi ná kjöri. Það gekk eftir en þess í stað var Þórður Snær ráðinn í áðurnefnda framkvæmdastjórastöðu hjá stjórnmálaflokknum.

Þórður Snær og Arnar Þór voru í hópi fimm blaðamanna sem fengu réttarstöðu sakborning í síma- og byrlunarmálinu. Rannsókn málsins stóð yfir um þriggja ára skeið en var felld niður í byrjun október á síðasta ár.