„Við erum með langhæstu stýrivextina miðað við þau lönd sem við viljum helst bera okkur saman við, þrátt fyrir það eru verðbólgan enn og aftur á uppleið og miklu hærri en í samburðalöndum,“ segir hann í pistli sínum og bætir við að verðbólgan sé á uppleið þó að búið sé að ganga frá afar hóflegum kjarasamningum, þrátt fyrir fækkun ferðamanna og þrátt fyrir að hagvöxtur sé nánast í frjálsu falli.

„Enn og aftur eru það viðskiptabankarnir og fjármálakerfið sem sleikja út um yfir okurvöxtum Seðlabankans enda nægir að horfa á afkomutölur bankanna því til sönnunar. Að hugsa sér að upp undir 40% af verðbólgunni síðustu 10 ár er vegna framboðsskorts á íbúðarhúsnæði sem hefur leitt til þess að íbúðarverð og leiguverð hefur rokið upp. Í dag er verið að byggja um 1600 íbúðir en þörfin er 5000 þúsund íbúðir. Síðan koma fjárfestar og kaupa 9 af hverjum 10 íbúðum sem koma á markaðinn og unga fólkið og fyrstu kaupendur komast ekki inn á húsnæðismarkaðinn m.a. vegna framboðsskorts og himinhárra vaxtakjara.“

Vilhjálmi líst alls ekki á blikuna.

„Ég skal fúslega viðurkenna að ég hef gríðarlegar áhyggjur af komandi mánuðum enda sýnist mér að það stefni í brotlendingu í íslensku samfélagi ef ekkert verður að gert. Enda nægir að nefna að upp undir 300 milljarðar af óverðtryggðum föstum húsnæðisvöxtum heimilanna eru að losna á þessu ári með þeim afleiðingum að vaxtabyrði heimilanna er að aukast frá 70% til 100% á einni nóttu.“

Vilhjálmur segir að ef allt væri eðlilegt væri búið að kalla Alþingi saman til að fara yfir stöðuna enda er hún grafalvarleg og ábyrgð stjórnvalda á ástandinu mikil.

„Eitt er víst að okurvextir fjármálakerfisins eru svo sannarlega ekki að skila þeim árangri sem almenningi er „talinn“ trú um að þeir muni gera og það nema síður sé. Já, peningastefna Seðlabankans hefur beðið skipbrot og Alþingi getur ekki spókað sig í sumarfríi á með óveðursskýin hrannast upp eins íslenska sumarið í ár er búið að vera!“