Joe Biden, forseti Bandaríkjanna, hefur ákveðið að leitast ekki eftir endurkjöri í embættið. Þetta kemur fram í færslu Biden á samfélagsmiðlinum X en þar lýsir hann yfir stuðningi við Kamölu Harris, varaforseta Bandaríkjanna, sem eftirmann sinn og hvatti fólk til þess að styrkja kosningabaráttu hennar. Sagði hann það hafa verið sína bestu ákvörðun að velja Harris sem varaforsetaefni sitt á sínum tíma.
My fellow Democrats, I have decided not to accept the nomination and to focus all my energies on my duties as President for the remainder of my term. My very first decision as the party nominee in 2020 was to pick Kamala Harris as my Vice President. And it’s been the best… pic.twitter.com/x8DnvuImJV
— Joe Biden (@JoeBiden) July 21, 2024
Þrýstingur á Biden um að stíga til hliðar hefur vaxið mikið undanfarnar vikur í kjölfar þess að hann hefur iðulega sýnt ýmis merki þess að vera illa áttaður og gerst sekur um óheppileg mismæli. Hann hefur þó ítrekað lýst því yfir að hann væri ekki á þeim buxunum að kasta inn hvíta handklæðinu í forsetaslagnum en nú hefur hann skyndilega séð sæng sína útbreidda.
Ýmsir framámenn innan Demókrataflokksins, eins og Nancy Pelosi og leikarinn Georg Clooney, hafa þrýst á Biden um að stíga til hliðar og fregnir af því að Barack Obama, forveri hans í embætti og vopnabróðir, hafi einnig hvatt hann til þess skiptu eflaust miklu máli.
Donald Trump, fyrrverandi Bandaríkjaforseti og keppinautur Biden um stólinn, tjáði sig um brotthvarf Biden í símtali við CNN skömmu eftir tilkynningu forsetans. Sagði hann Biden vera versta forseta, jafnvel langversta forseta, í sögu Bandaríkjanna. Hann væri ekki hæfur til að gegna embættinu nú og hefði aldrei verið. Þá sakaði hann Biden um að hafa unnið síðasta slag þeirra með lygum og fölskum fréttum.
Ákvörðun Biden er söguleg en sitjandi forseta hefur ekki stigið frá borði með þessum hætti síðan að Lyndon B. Johnson ákvað að sækjast ekki eftir endurkjöri árið 1968.
