Gunnar Smári gerði aðsenda grein Torfa H. Tulinius á Vísi að umtalsefni á Facebook-síðu Sósíalistaflokks Íslands í morgun. Var það einkum eitt í grein Torfa sem vakti athygli Gunnars Smára, þau orð að Katrín Jakobsdóttir geti nefnilega talað við alla.
„Ef það á við um alla þá er ég ekki hluti þess mengis, allir eru allir nema ég og örugglega margir fleiri. Ég hef rætt við alla frambjóðendur til forseta við Rauða borðið nema Katrínu, hún hefur ekki viljað mæta, þrátt fyrir mikla eftirgangssemi við tvo kosningastjóra hennar vikum saman,“ segir Gunnar Smári sem er ritstjóri Samstöðvarinnar.
Hann svarar því svo í athugasemdum að hann hafi ekki hugmynd um það hvers vegna Katrín hafi ekki þegið boð hans.
„Guðni Th. hefur komið, margir ráðherrar og allskonar fínifólk innan um alþýðu manna. Ég bendi bara á þetta hér, því Torfi og fleiri hafa verið að draga upp þá mynd af Katrínu að hún geti hitt alla. Ég og örugglega fleiri erum bara ekki innan þess mengis hjá Katrínu. Kannski hefur einhver sagt henni að áhorfendur á Samstöðina muni ekki kjósa hana í sama mæli og lesendur Moggans.“
Björn Þorláksson, samstarfsmaður Gunnars Smára á Samstöðinni, gerir svo færslu hans að umtalsefni á eigin síðu. Tekur hann undir gagnrýni hans.
„Hvað segiði? Talar Kata Jak við alla? Ekki er það mín saga. Katrín sem var áður í hópi burðarása í mínum hugmyndum um betra samfélag féllst ekki á að svara spurningum sem ég vildi leggja fyrir hana í bók um spillingu á Íslandi sem kemur út í sumar. Hún reyndar svaraði ekki tölvupóstum frá mér um efni bókarinnar og virti mig ekki viðlits sem bókarhöfund. Þau Bjarni Ben áttu þetta sameiginlegt. Þau voru í hópi örfárra sem neituðu að ræða við mig um spillingu. Og það sem Smári segir hér er dagsatt. KJ er eini frambjóðandinn til forseta sem ekki hefur viljað ræða við áhorfendur Samstöðvarinnar. Er Katrín allra eða er hún bara sumra? Hver er Katrín dagsins í dag? Er það allt önnur Katrín en maður taldi sig þekkja áður?“
