Farþegi, sem á dögunum var vísað út úr flugvél Play á leiðinni frá Kaupmannahöfn til Íslands, er ósáttur við flugfélagið og ekki síður við að hafa verið kallaður flugdólgur í frétt DV um málið.
Þetta kemur fram í grein á Fréttin.is þar sem nafnlaust viðtal birtist við umræddan mann.
Atvikið átti sér stað þann 16. júlí síðastliðinn og fjallaði frétt DV, sem bar yfirskriftina „Flugdólgur með barn olli usla í vél Play“. Í henni kom fram að seinkunn hefði orðið á heimför flugvélarinnar vegna uppákomunnar en manninum hafi verið vísað úr flugvélinni eftir ógnandi hegðun í garð flugþjóna. Þá hafi flugstjóri flugvélarinnar veitt öðrum farþegum flugvélarinnar þær upplýsingar að ekki væri hættandi á að fara með slíkan farþega í þriggja klukkustunda flug því ekki væri hægt að vita upp á hverju ætti að taka.
Í áðurnefndu viðtali Fréttarinnar segist fjölskyldufaðirinn hins vegar aðra sögu. Uppákoman hafi orðið vegna þess að hann hafi keypt flugsæti fyrir sex einstaklinga í vélina en að endingu hafi aðeins fjórir fjölskyldumeðlimir komist í flugið. Maðurinn hafi talið að hann ætti hins vegar rétt á að nýta sætin tvö sem borgað hafði verið fyrir en þar sem um svokallað „no show“ hafi verið að ræða þá hafi Play selt öðrum farþegum sætin.
Hafi fjölskyldufaðirinn rökrætt þetta við starfsfólk Play en hann hafi orðið furðulostinn þegar honum var tilkynnt að vísa ætti honum út úr flugvélinni. Að endingu fór það svo að fjölskylduföðurnum var hent út úr vélinni og ákvað fjölskylda hans, þar af ung dóttir hans, að yfirgefa flugvélina sömuleiðis.
Segir í áðurnefndri grein Fréttarinnar að fjölskyldan íhugi nú næstu skref og hafi ráðfært sig við lögfræðing. Play hafi aðeins boðið þeim bætur fyrir hluta flugmiðanna og þá hafi fjölskyldufaðirinn orðið fyrir opinberri niðurlægingu með því að vera uppnefndur „flugdólgur“ í áðurnefndri frétt DV þar sem „hrein og bein lygi“ hafi verið borinn á borð .
Viðbrögð ritstjórnar: Frétt DV um málið byggðist á frásögn annars farþega sem upplifði óþægindi vegna framkomu fjölskylduföðursins. Samkvæmt íslenskri nútímamálsorðabók þýðir orðið flugdólgur: „farþegi sem er til vandræða í flugvél vegna slæmrar hegðunar“. Telur ritstjórn það orð lýsa ágætlega, byggt á áðurnefndum heimildum, því sem hermt er að hafi átt sér stað í vél Play þennan dag.
