Ungir þjófar komu við sögu lögreglunnar á höfuðborgarsvæðinu á kvöld- og næturvaktinni. Tilkynnt var um þjófnað úr verslun í Háaleitis- og Bústaðahverfi. Þar reyndust hinir grunuðu ekki hafa náð sakhæfisaldri og var málið því unnið með foreldrum og barnaverndaryfirvöldum var gert viðvart.

Í Grafarvogi var tilkynnt um grunsamlegar mannaferðir. Þar var verið að bera hluti inn í bifreið. Reyndu viðkomandi að komast undan þegar lögreglan kom á vettvang en náðust fljótlega. Þetta voru þrír aðilar sem ekki eru orðnir lögráða. Þeir höfðu stolið gaskútum og einnig ekið bifreið án þess að hafa öðlast ökuréttindi. Málið var unnið í samvinnu við foreldra þeirra og barnaverndaryfirvöldum var gert viðvart um það.

Tveir ökumenn voru handteknir grunaðir um að vera undir áhrifum áfengis og/eða fíkniefna.

Eldur kom upp í rafmagnstöflu húss í Breiðholti. Lítið tjón varð.

Í Kópavogi var einn staðinn að þjófnaði úr verslun. Málið var afgreitt á vettvangi.