Kona hefur dæmd til þess að greiða fyrrum eiginmanni sínum 150 þúsund krónur í miskabætur eftir að hafa veist að honum á bókasafni Reykjanesbæjar árið 2016. Úrskurður þess efnis var kveðinn upp í Héraðsdómi Reykjaness á dögunum en maðurinn fór fram á miskabætur upp á 500 þúsund krónur.

Sat með börn þeirra í fanginu

Í dómnum kemur fram að parið hafi slitið hjúskap sínum árið 2014 en þá hafi komið upp ágreiningur varðandi forsjá tveggja barna þeirra. Bóksafn Reykjanesbæjar er staðsett í ráðhúsi bæjarins en þar var ráðgerður fundur með barnaverndarfulltrúa til þess að freista þess að höggva á hnútinn. Hjónin fyrrverandi voru stödd í bókasafnshluta hússins ásamt börnum sínum þegar sauð upp úr milli þeirra með þeim afleiðingum að konan réðst á manninn sem síðar kærði árásina.

Í dómnum kemur fram að konan hafi borið ýmsar ásakanir á manninn á fundinum og verið mjög æst. Til hafi staðið að konan myndi leita til Kvennaathvarfsins með börn sín eftir fundinn en eiginmaðurinn fyrrverandi þá viljað taka börnin þeirra tvö í fangið og kveðja þau.

Taldi ósannað að hann hefði orðið fyrir miska

Hafi konan verið ósátt við það og  freistað þess að taka þau af honum en þegar það gekk ekki hafi hún  veist að honum og sparkað í sköflung hans, slegið hann með krepptum hnefa og með flötum lófa nokkrum sinnum í öxl og upphandlegg, auk þess að klóra hann. Starfsmenn barnaverndar urðu vitni að atvikinu en kalla þurfti á lögreglu til að stöðva árásina og þurfu laganna verðir að hafa verulega fyrir því, svo vitnað sé í dóminn.

Maðurinn fékk læknisvottorð í kjölfar árásarinnar en þar kom fram að greina mátti fjögur grunn sár, líklega klórför, á handlegg hans.