Lögregla hefur enn ekki haft hendur í hári mannsins sem hleypti af skotum úr byssu á veitingastaðnum Dubliner í Naustum 1 um kvöldmatarleytið í gær.
DV greindi fyrst frá málinu og birti myndir og myndband frá vettvangi:
Grímur Grímsson, yfirlögregluþjónn á Miðlægri rannsóknardeild lögreglunnar á höfuðborgarsvæðinu, vildi ekki svara þeirri spurningu hvort lögreglan teldi sig vita hver maðurinn er, vegna rannsóknarhagsmuna. En þá vaknar sú spurning hvort starfsmenn eða gestir hafi borið kennsl á manninn:
„Hann huldi andlit sitt, maðurinn,“ segir Grímur. Aðspurður segir hann nokkur fjöldi gesta hafi verið á staðnum. „Ég held það hafi verið reytingur,“ segir hann.
Grímur segir rannsóknina vera á þeim stað að erfitt sé að gefa upplýsingar um hana. „Það er sérstaklega viðkvæmt þegar maðurinn er ófundinn,“ segir hann.
Aðspurður um hvernig fólki hafi orðið við vegna atviksins, segir hann: „Auðvitað verður fólki mjög bilt við, þegar það er inni á stað þar sem skotið er af byssu.“
Er ljóst að maðurinn var ekki að reyna að skjóta á neinn heldur vekja ógn?
„Þarna erum við á stað sem við getum ekki farið út í,“ segir Grímur og ítrekar að rannsókn málsins sé á mjög viðkvæmu stigi. Allt kapp verði lagt á að hafa hendur í hári mannsins í dag.
