Herdís Dröfn Fjelsted, fráfarandi forstjóri Valitor, og Sævar Pétursson, tannlæknir unnu dómsmál á dögunum þar sem þeim voru dæmdar bætur upp á rúmar 25 milljónir króna vegna lekavandamála í einbýlishúsi sem þau keyptu árið 2018 í Garðabæ.
Húsið, sem stendur við Mosprýði 10, í Garðabæ keyptu þau af Helgu Daníelsdóttur sem gjarnan kennd við skartgripaverslunina Leonard eins og eiginmaður hennar Sævar Jónsson.
Um sannkallaða höll er að ræða en húsið er heilir 672 fermetrar að stærð og var kaupverðið 272 milljónir króna. Kaupverðið var að hluta til greitt með raðhúsi Herdísar Drafnar við Sandakur 2 í Garðabæ sem var metið á 115 milljónir króna í viðskiptunum.
Málið höfðuðu Herdís Dröfn og Sævar gegn Helgu sem og byggingastjóra hússins, Ómari Steini Rafnssyni, arkitekti þess Guðmundi Tyrfingssyni og tryggingarfélaginu Verði. Fóru þau fram á tæpar 32 milljónir í skaðabætur vegna ýmissa galla á húsinu.
Fram kemur í dómnum að fyrir viðskiptin hafi húsið verið ástandsskoðað og þar hafi ýmis vandræði á eigninni komið fram. Samkomulag hafi verið milli aðila um að seljandi myndi annast viðgerðir á eigninni fyrir afhendinguna.
Eignin hafi verið afhend 1. október 2018 en fljótlega hafi komið í ljós að gallarnir á eigninni hafi verið mun umfangsmeiri en áður var talið. Herdís og Sævar fengu óháðan aðila til að taka eignina út og sá áætlaði að kostnaður við lagfæringar væru rúmlega 40 milljónir króna. Aðallega væri um að ræða vandamál vegna rangs frágangs á þaksvölum og gluggum við svalir.
Fóru Herdís og Sævar fram á að Helga myndi greiða fyrir viðgerðina sem seljandi en því var hafnað.
Málsvörn hina stefndu byggðist á því að gallarnir hafi verið ófyrirséðir og að Helga hafi selt eignina í góðri trú og án þess að gera sér fyrir fyrir umfanginu.
Í dómnum kemur fram að húsið hafi verið markaðsett sem ein glæstilega og vandaðasta eign landsins og því hafi Herdís og Sævar átt að geta treyst því að eignin hafi verið gott sem gallalaus.
Hér má kynna sér ítarlegan dóm Héraðsdóms Reykjaness en í honum kemur meðal annars fram að frágangur við voldugan peningaskáp í eigninni hafi verið óforsvaranlegur og því stafaði af honum ólykt.
Að endingu komst héraðsdómur að þeirri niðurstöðu að Helga bæri að greiða Herdísi og Sævari rúmar 25 milljónir króna í bætur og þar af rúma 21 milljón með byggingarstjóranum Ómari Steini. Guðmundur og Vörður tryggingar voru sýknuð í málinu.
Þá var Helgu og Ómari Steini gert að greiða tæpar 5 milljónir í málskostnað en Herdís og Sævar þurfa að greiða Guðmundi og Verði málskostnað upp á um 2 milljónir króna.
