Einar Hermannsson hefur sagt af sér sem formaður SÁÁ. Þetta kemur fram í tilkynningu hans til fjölmiðla rétt í þessu. Þar segist hann segja af sér vegna þess að hann hafi fyrir nokkrum árum svarað auglýsingu á netinu þar sem í boði var kynlíf gegn greiðslu. Segist hann iðrast þessa og að hafa valdið fjölskyldu sinni sársauka og biður alla sem málið varðar afsökunar.
„Ég hef í dag sagt af mér sem formaður SÁÁ.
Fyrir nokkrum árum svaraði ég auglýsingu á netinu þar sem í boði var kynlíf gegn greiðslu. Sú hegðun er ófyrirgefanleg en ég taldi mér ranglega trú um að þau samskipti væru grafin og gleymd og þau hafa ekki haft áhrif á störf mín fyrir SÁÁ. Ljóst er hins vegar að umræða um þetta mál er einungis til þess fallin að varpa rýrð á SÁÁ ef ég sit þar áfram sem formaður.
Ég iðrast að hafa farið þessa leið og að hafa valdið fjölskyldu minni sársauka vegna hegðunar minnar. Bið ég alla þá sem málið varðar afsökunar á framferði mínu.“
Einar var kjörinn formaður SÁÁ í júní 2020 og hafði þar betur gegn Þórarni Tyrfingssyni, en miklar deilur og ólga höfðu verið innan samtakanna í aðdraganda formannskjörsins.
Sjá einnig:
Frambjóðandi til formanns SÁÁ:Hann vill ráða einn en ég vil dreifa valdinu
