Fréttablaðið skýrir frá þessu í dag. Haft er eftir Jóni Viðari Matthíassyni, slökkviliðsstjóra, að starfsmenn hafi breytt öllu hjá sér til að sinna þessu verkefni.
„Við höfum þurft að fjölga starfsstöðvum til að minnka líkurnar á að okkar starfsfólk smitist. Við verðum líklega með um ellefu starfsstöðvar á höfuðborgarsvæðinu þegar við höfum lokið við að setja allt upp, vanalega erum við með fjórar.“
SHS hefur sett upp starfsstöðvar víða um borgina, til dæmis í húsnæði Frumherja og björgunarsveitarinnar Ársæls á Granda og á Grand Hóteli.
Ástæðan fyrir fjölgun stöðvanna er að nauðsynlegt þykir að minnka þann fjölda starfsfólks sem vinnur saman með það að markmiði að ef smit kemur upp lendi færri í sóttkví eða einangrun.
„Starfsfólkið hefur tekið vel í þessar breytingar og sér tilganginn í þessum aðgerðum. Okkar starfsmenn eru útsettari fyrir smiti en margir aðrir því að þeir sinna smituðum einstaklingum og það hefur áhrif á starfið og þeirra einka- og fjölskyldulíf ef þeir lenda í sóttkví eða einangrun.“
Er haft eftir Jóni Viðari sem benti einnig á að viðbragðstíminn verði einnig að vissu leyti betri þar sem starfsstöðvarnar eru dreifðari um höfuðborgarsvæðið. SHS hefur einnig tekið nýja bíla í notkun til að flytja þá sem eru COVID-19 smitaðir.
„Í þessum nýju bílum getum við flutt COVID-sjúklinga sitjandi ef þeir eru ekki það slæmir að þeir þurfi að liggja út af. Við erum með tvo þannig bíla og svo erum við líka með bíla sem eru sérstaklega fyrir COVID-sjúklinga sem þarf að flytja liggjandi.“
Sagði Jón Viðar.
