Á miðvikudaginn síðastliðinn stigu þjóðþekktir Íslendingar fram í myndbandi frá hlaðvarpinu Eigin Konur og lýstu yfir stuðningi við þolendur ofbeldis. Myndbandið hafði yfirskriftina #ÉgTrúi og voru skilaboðin sú að þolendum ofbeldis eigi að vera trúað.

Edda Falak og Fjóla Sigurðardóttir, þáttastjórnendur Eigin Kvenna,tóku myndbandið niður í gær. Í samtali við Vísi sagði Edda að það væri „smá leiðinlegt mál“. Hún sagði að í kjölfar birtingu myndbandsins hafi farið alls konar sögur af stað um þátttakendur myndbandsins. Edda fór ekkert nánar út í um hvaða fólk sögurnar væru.

Nú hafa tveir karlmenn, sem tóku þátt í myndbandinu, stigið fram og viðurkennt að þeir hefðu báðir farið yfir mörk kvenna. Þeir Pálmar Ragnarsson, fyrirlesari og rithöfundur, og Magnús Sigurbjörnsson, stafrænn ráðgjafi og bróðir Áslaugar Örnu Sigurbjörnsdóttur dómsmálaráðherra. Myndbandið hefur einnig verið gagnrýnt vegna þátttöku Áslaugar Örnu dómsmálaráðherra. Meðal þeirra sem hafa gagnrýnt Áslaugu Örnu er Sema Erla Serdar, baráttukona fyrir flóttafólk.

Þarf að horfast í augu við að hafa farið yfir mörk

Magnús deildi færslu í Instagram Story þar sem hann viðurkenndi að hafa farið yfir mörk. „Mér þykir það leitt og vil ég biðjast afsökunar,“ segir hann.

Pálmar tók fyrst þátt í umræðunni í síðustu viku þegar hann deildi pistil á Instagram. Færslan sló í gegn, fékk tæplega fimm þúsund „likes“ og var deilt víða um samfélagsmiðla. Í kjölfarið kom hann fram í myndbandi Eigin Kvenna. Pálmar deildi nýrri færslu í gær og sagðist sjálfur mjög líklega hafa farið yfir mörk kvenfólks í sínu lífi. „Á því vil ég taka ábyrgð og biðjast afsökunar,“ segir hann.

 

View this post on Instagram

 

A post shared by Pálmαr Rαgnαrssσn (@palmarragg)

„Ég er ekki fullkominn þó ég kjósi að taka þátt í umræðunni […] Við karlmenn megum ekki útiloka að við höfum farið yfir mörk á einhverjum tímapunktum […] Ég hef brugðist góðri vinkonu þegar ég var yngri með því að taka ekki afstöðu. Í kjölfar þessarar umræðu hef ég reynt að bæta fyrir það. Við getum ekki breytt fortíðinni. En við getum breytt því hvernig við tökum ábyrgð á okkur sjálfum og vinum okkar í framtíðinni,“ skrifar Pálmar á Instagram.

Point being:
Það er nánast ógerlegt að treysta karlmönnum sem vilja vera með í þessari baráttu því þeir virðast allir hafa eitthvað að fela. Svo troða þeir sér fremst í druslugönguna og alla baráttu og við þurfum bara einhvernveginn að vona að það séu engin brot þarna á bakvið.

— Kolbrún Birna (@kolla_swag666) May 13, 2021

Þátttaka dómsmálaráðherra

Myndbandið #ÉgTrúi fékk mikið lof og var deilt víða. En það hefur einnig verið gagnrýnt, ekki aðeins vegna þátttakendanna sem hafa farið yfir mörk kvenna.

Áslaug Arna dómsmálaráðherra hefur verið gagnrýnd fyrir þátttöku sína í myndbandinu. „Finnst kaldhæðnislegt að sjá ráðherra fordæma kynferðislegt ofbeldi á sama tíma og hann sendir börn og flóttafólk úr landi sem eru iðulega þolendur ofbeldis,“ segir einn netverji á Twitter.

Sema Erla Serdar, baráttukona og stjórnmála- og Evrópufræðingur, gagnrýndi einnig Áslaugu.

Dómsm.ráðherra við þolendur ofbeldis: „Ég trúi ykkur&stend með ykkur!“*
*nema auðvitað ef þið eruð flóttakonur, sem eru berskjaldaðar gagnvart ofbeldi,
flóttabörn, sem eiga á hættu á að vera rænt,seld í vændi,mansal, þrælahald,
þolendur mansals,
aðrir þolendur sem sækja um vernd.

— Sema Erla (@semaerla) May 13, 2021

Óskar Steinn Jónínuson Ómarsson, fyrrverandi ritari Samfylkingarinnar og áður stjórnarmaður í Félagi ungra jafnaðarmanna, fannst þátttaka Áslaugar skondin í þessu samhengi.

Manneskjan sem stendur í stafni fyrir þessari ofbeldisstefnu að birtast í einhverju myndbandi þar sem hún segist styðja þolendur ofbeldis er beyond fyndið. https://t.co/ptUtjcp1UD

— 🌏🌹 óskar steinn 🌹🌍 (@oskasteinn) May 13, 2021