Aðstoðarskiptastjóri dánarbús Michael Jackson, John Branca, tjáði sig í fyrsta skipti um heimildarmyndina Leaving Neverland í gær á viðburði sem bar yfirskriftina „Réttarhöld í fjölmiðlum“ sem fór fram í Harvard-háskólanum á dögunum.

Branca neitaði því að sannleikurinn kæmi fram myndinni sem vakið hefur mikla athygli að undanförnu. Í myndinni segja þeir James Safechuck og Wade Robson frá meintu kynferðisofbeldi sem þeir urðu fyrir af hálfu Jackson.

„Þetta fólk skáldaði bara upp einhverja bölvaða sögu því það vildi eignast pening en við ætlum ekki að leyfa því að viðgangast,“ segir hann.

Dánarbú Michaels kærði HBO, dreifingaraðila myndarinnar, en lögsóknin nemur 100 milljónum Bandaríkjadollara. HBO sagðist treysta Dan Reed, leikstjóra og framleiðanda myndarinnar.

Branca sagði líka: „Lögin varðandi óhróður eru eins og þau eru, við getum ekkert sagt né gert. Ímynd hans getur eyðilagst og börnin hans orðið fyrir skaða en það er ekkert hægt að gera í því. Ég sting upp á því að lögunum verði breytt til að vernda þá framliðnu, allavegana tímabundið. Þar sem þetta snýst um sannleikann, sanngirni og jafnvægi.“

Branca, sem þekkti Michael persónulega, segist skilja að fólk vilji meina að hann sé ekki hlutlaus vegna þess að hann eigi hagsmunum að gæta, en Branca græðir á vörumerki Jackson. „Ég þekkti manninn og mér líkar ekki það sem hefur gerst, því þú færð ekki að heyra hina hlið málsins,“ og bætir við: „Vonandi kemur raunverulegur sannleikurinn í ljós.“

Hann segir svo að lokum að hann vonist til að tónlist Michael Jackson fái áfram að lifa. „Hann er of stór til að falla.“