Hulda og Þorsteinn skrifuðu harðorðaðan pistil og kölluðu Þorgrím meðal annars risaeðlu og forréttindafirrtan karlmann. Þau gáfu einnig sterklega í skyn að Þorgrímur hefði ekkert erindi að tjá sig um þessi mál þar sem hann væri ekki menntaður á þessu sviði.
„Þorgrímur Þráinsson er fæddur 1959 með stúdentspróf og eins árs nám á bakinu í frönsku. Síðan hefur hann allskonar flotta reynslu og skrifað fullt af bókum. En er þetta raunverulega það sem börn eiga að þurfa að hlusta á? Lífsskoðanir og forneskjulegar hugmyndir miðaldra rithöfundar með enga haldbæra menntun á sviðinu sem hann er að tjá sig um,“ sögðu þau meðal annars.
Sjá einnig: Hulda og Þorsteinn hjóla í Þorgrím Þráins – Kalla hann „risaeðlu“ og „forréttindafirrtan karl“
Hulda skrifaði einnig pistil á Vísi um málið þar sem hún gagnrýndi orðræðu Þorgríms enn frekar.
Þorgrímur svaraði hjónunum og öðrum gagnrýnendum í stuttum pistli á Facebook og bendir á að hann sé með áratuga reynslu á þessum vettvangi.
„Fyrir þá sem ná ekki upp í nefið á sér og gera lítið úr skóla lífsins og áratuga reynslu á vettvangi er ágætt að benda þeim á að ég er að mestu leyti (í Kastljósi) að vitna í bók sem ætti að vera skyldulesning fyrir þá sem eiga eða umgangast börn og ungmenni – The Anxious Generation. Það mætti líka leita á netinu af því sem höfundur bókarinnar, Jonathan Haidt, segir almennt um þessi mál. Hann er hámenntaður,“ sagði hann og bætti við:
„Og svo er ofureinfalt fyrir þá, sem hafa risa-áhyggjur af því að ég sé að ræða við ungmenni alla daga, að taka upp símann og hringja í einhvern af þeim 160 skólum sem ég hef heimsótt í vetur og spyrja skólastjóra, aðstoðarskólastjóra, námsráðgjafa, deildarstjóra, umsjónarkennara, kennara, stuðningsfulltra, já eða nemendur, á hvaða nótum ég ræði við ungmennin.
P.s. svo hef ég horft upp á athyglisbrest, „kvíða“, einhverfuróf, tourette og almenna vanlíðan heima hjá mér í yfir 20 ár. Og líka hvernig það er tæklað.“
