Kvikmyndin Ljósbrot eftir Rúnar Rúnarsson hefur verið valin á BFI London kvikmyndahátíðina sem er stærsta kvikmyndahátíð Bretlands, og jafnframt talin sú mikilvægasta.

„BFi london er frábær hátíð og hlakka ég til að fara. Það er um að gera að njóta á meðan nefinu stendur. Það eru ekki alltaf jólin. Þetta er búið að vera mikið ævintýri og stundum fáum við daglega góðar fréttir af myndinni okkar.  Við erum svo þakklát öllum sem gerðu þessa mynd af veruleika,“ segir Rúnar.

Ljósbrot hefur verið að fara sigurför um heiminn eftir að hafa hlotið standandi lófaklapp sem opnunarmynd á Kvikmyndahátíðinni í Cannes. Myndin hefur unnið fimm alþjóðleg kvikmyndaverðlaun og einnig hefur Ljósbrot verið valin í forval til Evrópsku kvikmyndaverðlaunanna. Framundan eru fjölda kvikmyndahátíða, líkt og kvikmyndahátíðin í Toronto sem er sú mikilvægasta í Norður-Ameríku og Busan sem er sú stærsta og mikilvægasta í Asíu.

Ljósbrot hefur einnig selst vel og mun fara í almennar sýningar um allan heim á næstunni.

Með aðalhlutverk í myndinni fara Elín Hall, Katla Njálsdóttir, Mikael Kaaber,  Baldur Einarsson, Gunnar Kristjánsson og Ágúst Wigum.

Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr.