Þetta kemur fram í nýrri grein Alison Boshoff hjá Daily Mail þar sem samband Sussex-hjónanna við áhrifafólk í Hollywood og fyrrverandi vini þeirra er tekið til skoðunar.
Boshoff rifjar upp að meðal gesta í brúðkaupinu í Windsor hafi verið Oprah Winfrey, George og Amal Clooney, David og Victoria Beckham, Serena Williams, Idris Elba og fjölmargir leikarar úr þáttunum Suits.
Samkvæmt heimildum greinarinnar hefur verulega fjarað undan mörgum þessara vináttusambanda frá því Harry og Meghan fluttu til Bandaríkjanna árið 2020 og sneru baki við hlutverki sínu innan bresku konungsfjölskyldunnar.
Sérstaklega er fjallað um samband þeirra við Opruh Winfrey, sem tók hið fræga viðtal við hjónin árið 2021 þar sem þau lýstu reynslu sinni innan konungsfjölskyldunnar. Heimildarmenn segja að Oprah hafi síðan haldið ákveðinni fjarlægð frá þeim og að sambandið sé langt frá því að vera eins náið og áður.
Í greininni er rætt við fjölmiðlakonuna og fyrrverandi Page Six-dálkahöfundinn Paulu Froelich sem segir að Oprah vilji þó ekki fjarlægjast þau of mikið.
„Ef eitthvað stórt gerist – skilnaður, dauðsfall eða drama – þá vill hún fá viðtalið,“ segir Froelich.
Einnig er haft eftir heimildarmanni að George og Amal Clooney vilji nú „ekkert með þau hafa“, þrátt fyrir að hafa áður boðið Harry og Meghan í heimsóknir og ferðalög á einkaþotu sinni.
Froelich tekur í sama streng og segir Clooney-hjónin aldrei hafa verið raunverulega náin Meghan.
„Þau eiga bókstaflega ekkert sameiginlegt með henni og standa með konungsfjölskyldunni,“ segir hún.
Þá er því haldið fram að David Beckham og Harry prins hafi einnig fjarlægst hvor annan á undanförnum árum.
Samkvæmt greininni hafi Meghan grunað Victoriu Beckham um að leka upplýsingum um hana til fjölmiðla, sem hafi farið afar illa í David Beckham. Jafnframt sé David sagður hafa haldið áfram að styrkja tengsl sín við aðra meðlimi konungsfjölskyldunnar, meðal annars Vilhjálm prins og Karl Bretakonung.
Boshoff segir að sumir fyrrverandi vinir telji Meghan og Harry leggja mikla áherslu á tengsl við frægt og áhrifamikið fólk, en eigi erfitt með að líta í eigin barm þegar samböndin fjara út.
„Þau halda aldrei að vandinn sé hjá þeim sjálfum,“ segir einn heimildarmaður greinarinnar.
