Tónlistarmaðurinn Bubbi Morthens hefur lýst yfir stuðningi við Katrínu Jakobsdóttur til embættis forseta Íslands. Katrín er umdeildur frambjóðandi hafa margir sett sig á móti því að forsætisráðherra hoppi úr ráðuneyti sínu yfir á Bessastaði til að veita aðhaldi ríkisstjórninni sem hún fór áður sjálf fyrir. Bubbi greinir frá því að Facebook að vissulega sé öllum frjálst að hafa sínar eigin skoðanir. Fólk þurfi þó að virða að aðrir hafi rétt til þess að vera þeim ósammála. Hann greinir frá því að hatri hafi rignt yfir hann á samfélagsmiðlinum frá því að hann lýsti yfir stuðningi við Katrínu og orðbragðið slíkt að hann verði að velta því fyrir sér hvað fái fólk til að haga sér með þessum hætti.
„Hvað fær fólk til að senda ljót skilaboð, krefja mann um skýringar, hóta manni, ógna manni? Fara inn á heimasíðu manns með dólg, viðhafa orðbragð sem viðkomandi myndi aldrei nota heima hjá sér? Dæmi: Hvað fékkstu borgað fyrir að sleikja hóruna? Ertu að borga fyrir listamannalaunin? Söngstu ekki um hommana, viðbjóðurinn þinn? Ertu að móti þeim núna? Og margt fleira sem er ekki hafandi eftir. Þetta er stöðugt áreiti frá því að ég lýsti yfir stuðningi við framboð Katrínar.
Aldrei dytti mér til hugar að fara inn á síður hjá öðrum með dólg líkt og fólk gerir hjá mér. Ég skulda engum neitt, hvað þá skýringar. Það kveður svo rammt að þessu að fólk veigrar sér við að lýsa yfir stuðningi við framboð Katrínar opinberlega því það er ráðist á það um leið. En frelsi til að velja sér frambjóðanda á að virða, sama hver á í hlut. Netofbeldið sem er verið að beita gegn þeim sem styðja Kötu er komið út fyrir öll mörk og það er lítið lýðræði í því.“
