Eins og greint hefur verið frá í fjölmiðlum um allan heim réðst 17 ára piltur inn á dansnámskeið fyrir börn í bænum Southport í Englandi, með hníf fyrir um þremur vikum. Þrjár stúlkur, 6-7 ára, létust og sex önnur börn slösuðust. Námskeiðið var með sérstakri áherslu á tónlist söngkonunnar heimsþekktu Taylor Swift. Söngkonan hitti nokkur barnanna sem lifðu árásina af og fjölskyldur þeirra fyrir tónleika sem hún hélt á þjóðarleikvangi Englendinga, Wembley í London, um helgina.
Mirror greinir frá þessu. Þar kemur einnig fram að Swift hafi haft samband við fjölskyldur stúlknanna sem létust og fjölskyldur annarra barna sem voru á námskeiðinu en lifðu af.
Talið er að um 25 börn hafi verið á námskeiðinu sem var haldið í miðstöð sem býður upp á margvísleg námskeið fyrir börn á sumrin þegar frí er í skólum.
Fram kom strax í fréttaflutningi af árásinni að námskeiðið hefði verið með sérstakri áherslu á tónlist Swift. Það fór ekki framhjá söngkonunni heimfrægu sem tjáði sorg sína á samfélagsmiðlum. Hún sagðist eiga bágt með að skilja að krakkar á dansnámskeiði hefðu orðið fyrir slíkum hryllingi og hún ætti í miklum erfiðleikum með að finna réttu orðin til að tjá fjölskyldum barnanna samúð sína.
Árásin er ekki eina ógnin sem steðjað hefur að viðburðum tengdum Swift. Þremur tónleikum hennar sem haldi átti í Vín höfuðborg Austurríkis var aflýst eftir að upp komst um áform um að fremja hryðjuverk á tónleikunum.
Öryggisgæsla á tónleikunum á Wembley var í kjölfarið hert en alls heldur Swift átta tónleika á leikvanginum fræga. Öllum sem ekki eru með miða á tónleikana verður vísað burt frá öllum inngöngum inn á leikvanginn. Hver gestur má aðeins koma með einn bakpoka, í mesta lagi að stærð A4, inn á svæðið. Allar grímur fyrir vitum verða bannaðar nema að trúarlegar eða læknisfræðilegar ástæður liggi þar að baki. Sömuleiðis verður harðplast, hvers kyns keðjur sem notaðar eru sem skartgripir sem og skartgripir með áföstum skreytingum bannað á svæðinu.
