Winslet var í viðtali við bandaríska stórblaðið New York Times fyrir skemmstu þar sem hún var spurð út í Ozempic-æðið en um er að ræða lyf sem fjölmargar stjörnur í Hollywood hafa notað í þeim tilgangi að léttast.
„Í sannleika sagt veit ég ekki hvað Ozempic er. Það eina sem ég veit er að þetta er pilla sem fólk tekur eða eitthvað álíka.“
Þegar blaðamaður útskýrði fyrir henni hvað lyfið gerði sagði hún: „Guð minn góður. Það hljómar hræðilega. Við skulum endilega borða meira.“
Winslet opnaði sig svo um baráttu sína við átröskun en það gerðist um það leyti sem hún lék í Titanic við hlið Leonardo DiCaprio.
Var Winslet gagnrýnd á þeim tíma fyrir að vera of þung og lýsti leikkonan og skemmtikrafturinn Joan Rivers því á sínum tíma að Kate Winslet hefði sökkt Titanic vegna þyngdar sinnar. Þetta hafði mikil áhrif á Winslet sem þróaði með sér átröskun í kjölfarið.
„Ég sagði aldrei neinum frá þessu,“ sagði leikkonan og bætti við að almennt væri fólki hrósað fyrir að léttast. Það væri samasemmerki milli þess að léttast og líta vel út.
Winslet opnaði sig um orðræðuna á sínum tíma í viðtali við hlaðvarpsþáttinn Happy Sad Confused. Í honum sagðist hún hafa óskað þess að hafa svarað betur fyrir sig á sínum tíma þegar gagnrýnin var sem mest.
„Ég hefði sagt: „Ekki dirfast að koma svona fram við mig. Ég er ung kona, líkaminn minn er að breytast og ég er að átta mig á hlutunum, ég er mjög óörugg, ég er hrædd og ekki gera þetta erfiðara en þetta er nú þegar.““
Winslet bætti því við að sem betur fer væri þetta að breytast, sérstaklega í kvikmyndabransanum. Áður fyrr hefði staðan verið hræðileg og fyrst hafi verið spurt um holdafar ungra leikkvenna áður en talið barst að hinum raunverulegu þáttum leiklistarinnar.
