Novo Nordisk framleiðir bæði Ozempic og Wegovy sem eru vinsæl þyngdarstjórnunarlyf. Tugir einstaklinga hafa höfðað málsókn gegn lyfjarisanum vegna alvarlegra aukaverkana og halda því fram að hann hafi ekki varað þá við hættum lyfsins.
DailyMail ræddi við nokkra einstaklinga og lögfræðinga sem sögðu að þetta væri rétt svo byrjunin, að „þúsundir“ annarra myndu einnig stíga fram og fara í mál gegn Novo Nordisk.
Brea Hand, 23 ára, byrjaði að nota Ozempic í maí 2023 og nokkrum vikum seinna byrjaði hún að kljást við aukaverkanir eins og flökurleika, uppköst og hægðatregðu.
Hand, sem er tveggja barna móðir, fékk áskrifað lyfið til að hafa stjórn á þyngd sinni og koma í veg fyrir sykursýki.
Hún leitaði sér aðstoðar fimm sinnum á sjúkrahúsi þar til hún fékk loksins hjálpina sem hún þurfti. Hún var loksins greind með meltingartruflanir og ketónblóðsýring af völdum sykursýki, sem getur verið lífshættulegt.
Í síðustu spítalaheimsókninni var hún strax lögð inn. „Þau sögðu að að ef ég hefði beðið í einn dag í viðbót þá hefði ég ekki lifað þetta af,“ sagði Hand, sem lagði fram kæru gegn Novo Nordisk í lok desember í fyrra.
„Þetta var ógnvekjandi og sársaukafullt. Ég hef aldrei upplifað svona mikinn sársauka og langar aldrei aftur að ganga í gegnum þetta.“
Hand segir að hún hafi ekki verið meðvituð um aukaverkanir lyfsins þegar hún byrjaði á því og vill deila sögu sinni til að vara aðra við áhættunni sem getur fylgt lyfi eins og Ozempic.
Fleiri hafa höfðað mál gegn lyfjarisanum, flestir þeirra segjast hafa upplifað alvarlegar meltingartruflanir eftir að hafa byrjað á lyfinu. Ein kona segir að hún muni vera með niðurgang það sem eftir er vegna Ozempic, önnur segist hafa misst tennurnar því lyfið hafi látið hana kasta svo mikið upp.
Billie Farley, 47 ára, hefur fengið að heyra frá læknum að hún muni aldrei hafa eðlilegar hægðir aftur. Hún var á Ozempic í þrjá mánuði þegar hún byrjaði að kasta upp og fékk gífurlegan verk í kviðinn. Hún þurfti að gangast undir níu tíma aðgerð og eftir það hefur líf hennar aldrei verið samt. „Hún hefur ekki haft almennilegar hægðir síðan þá og hefur fengið að heyra frá læknum að hún muni aldrei hafa eðlilegar hægðir aftur,“ kemur fram í málsókn Farley gegn Novo Nordisk.
Farley heldur því fram að lyfjarisinn hafi ekki látið hana vita af mögulegum aukaverkunum Ozempic.
„Líf hennar er breytt vegna Ozempic.“
Robyn Kelly, 49 ára, segist hafa fengið svo miklar meltingartruflanir á lyfinu að hún hafi þurft að taka með sér aukaföt hvert sem hún fór ef hún skyldi kasta upp eða fá hægðir í fötin sín, sem gerðist reglulega.
„Ég var svo veik,“ segir hún.
Í lögsókn Kelly kemur fram að Novo Nordisk „vissi eða hefði átt að vita að Ozempic væri mjög hættulegt“ og að fyrirtækið hafi „ekki varað hana nægilega við áhættunni á meltingartruflunum.“
Hægt er að lesa nánar um málsóknirnar í umfjöllun DailyMail.
