Einn óvæntasti Taylor Swift-aðdáandi landsins er vafalaust Hannes Hólmsteinn Gissurarson, prófessor emeritus í stjórnmálafræði við Háskóla Íslands. Það gladdi notendur X, áður Twitter, mjög þegar prófessorinn auglýsti tvo miða til sölu á tónleika stórstjörnunnar í kanadísku stórborginni Vancouver sem fara fram í desember á næsta ári.

Það er þó eflaust ótrúleg upplifun að skella sér á tónleika Swift enda er hún ein stærsta og vinsælasta stjarna heims um þessar mundir og því ekki ólíklegt að Hannes hafi ákveðið að skella sér ef útlit var fyrir að hann yrði í borginni um þetta leyti á næsta ári.

Áhugi prófessorsins á söngkonunni virðist þó vera enn meiri því í nótt auglýsti hann aftur tvo miða á tónleika Swift en nú í Miami-borg en þeir tónleikar fara fram í október á næsta ári.

Miðað við þennan áhuga má telja líklegt að Hannes hafi verið meðal gesta á alræmdum tónleikum Swift í Rio de Janeiro, öðru heimili prófessorsins, í nóvember. Tónleikarnir komust í heimsfréttirnar þegar að þeim var aflýst rétt áður en Swift steig á svið því áhorfandi ofhitnaði og lést í kraðakinu fyrir tónleikana.