Leikarinn og hjartaknúsarinn Brad Pitt er sagður vera kominn með nýja kærustu. Sú heppna er Ines de Ramon.
Hún er næringarfræðingur, mikil áhugakona um heilsu og hreyfingu, talar þrjú tungumál og er varaforseti skartgripafyrirtækisins Anita Ko.
De Ramon var áður gift leikaranum Paul Wesley, sem er hvað þekktastur fyrir leik sinn í geysivinsælu þáttunum Vampire Diaries.
Wesley og de Ramon tilkynntu um skilnað sinn fyrir tveimur mánuðum eftir þriggja ára hjónaband.
Brad Pitt var giftur Angelinu Jolie og eiga þau saman sex börn. Angelina sótti um skilnað árið 2016 og síðan þá hafa hatrammar skilnaðardeilur átt sér stað.
Á sunnudaginn voru turtildúfurnar myndaðar á Bono tónleikum í Los Angeles. Page Six birti myndirnar.
Það munar tæplega þrjátíu árum á parinu, Brad Pitt er 58 ára og Ines de Ramon er 29 ára.
Samkvæmt heimildarmanni People kynntust Pitt og de Ramon fyrir nokkrum mánuðum „í gegnum sameiginlegan vin“ og leikarinn er „mjög hrifinn“ af dömunni.
Annar heimildarmaður staðfesti að þau væru nýlega byrjuð að deita en séu ekki skuldbundin hvort öðru og eru frjáls til að hitta annað fólk.
„Ines er sæt, skemmtileg og orkumikil. Hún er með frábæran persónuleika og Brad nýtur þess að eyða tíma með henni,“ sagði heimildarmaðurinn.
