Aneece Malik, frá Manchester, hefur látið breyta útliti sínu til að líkjast samfélagsmiðla „filter“ og hefur aldrei verið jafn hamingjusamur. Mirror greinir frá.

Aneece var mjög óöruggur, sérstaklega þegar kom að því að birta myndir af sjálfum sér á samfélagsmiðlum. Hann birti aldrei myndir án þess að nota „filtera“ til að breyta útliti sínu.

Hann ákvað að taka málin í eigin hendur og gekkst undir nokkrar fegrunaraðgerðir til að líkjast meira þessum „filterum“ í alvörunni. Hann hefur eytt meira en 22 milljónum í að breyta útliti sínu. Hann hefur meðal annars látið fylla í varir sínar og kinnar, farið í bótox og háreyðingalaser og svo kallað „micro blading“.

Það mætti segja að Aneece sé óþekkjanlegur enda var það markmiðið með þessu öllu saman.

„Ég var ekki ánægður með mig og var vanur að nota alltaf „filter“ áður en ég deildi einhverju á samfélagsmiðlum […] Ég ákvað að verða bara „filter“ og líða þannig vel í eigin skinni,“ segir hann.

Aneece býr í Tyrklandi og eyðir miklum pening í að viðhalda breyttu útliti sínu. Hann segist vera mun öruggari núna og fylgjendahópur hans á samfélagsmiðlum stækkar ört.

„Ég er með þráhyggju fyrir útliti mínu og það verður að vera fullkomið. Sumir lýtalæknar neita að sprauta í andlit mitt og segja að þetta sé komið gott, þannig ég fer á mismunandi stofur í hverjum mánuði,“ segir hann.

Aneece segir að hann hefði fengið litla sem enga athygli áður en hann breytti útliti sínu. „Nú heldur fólk augnsambandi við mig og ég veit að það er vegna þess að það dáist að mér.“