Íslendingur sem búsettur er í New Plymouth á Nýja Sjálandi hefur átt í útistöðum við nágranna sína, eldri hjón, í hátt í þrjá áratugi. Hjónin, Roy og Marilyn Bridger  segjast nú loksins sjá sig tilneydd til að flytja. Fjallað var um þetta sérkennilega mál í  fréttaþættinum Fair Go nú á dögunum.

Fram kemur í þættinum að deilurnar hafi staðið yfir árum saman. Íslendingurinn, Valdimar Einarsson segir í samtali við þáttastjórnendur að hjónin hafi meðal annars hent kattasandi og garðúrgangi á lóðina hans. Þá sakar hann þau um að hafa beitt dónaskap og svívirðingum. Hjónin neita þeim ásökunum alfarið.

Hjónin segja að áður hafi þau haft glæsilegt útsýni frá húsinu yfir á Tasmaníuhaf.  Á seinasta ári hafi Valdimar hinsvegar reist hátt grindverk á lóðinni. Útsýnið er nú algjörlega horfið.

Marilyn er haldin ólæknandi krabbameini og segir í samtali við Fair Go að hún vilji eyða seinustu ævidögunum annars staðar. Hún sé búin að fá nóg. „Hver vill sitja og horfa á þetta allan daginn?“ spyr hún.

Þáttastjórnendur ræddu einnig við Valdimar á seinasta ári. Þá sagðist hann hafa „fengið sig fullsaddan af framkomu hjónanna.“ Hann hefði því ákveðið að reisa grindverkið.

„Þau misstu útsýnið þitt og þau munu ekki fá það aftur og það er útrætt mál.“

Þá segir Valdimar á öðrum stað í þættinum: „Þið getið sýnt þennan þátt ef þið viljið, mér er ****** sama!“

Þá kemur fram í þættinum að hreppsnefndin í New Plymouth hafi reynt ítrekað að koma á samkomulagi milli Valdimars og hjónanna en án árangurs.

Fulltrúi nefndarinnar segir að leitað hafi verið eftir sérfræðiáliti vegna málsins og jafnframt hafi verið rætt um að leita til úrskurðarnefndar umhverfismála. Það er þó ekki hægt að benda á nein brot á lögum eða reglugerðum í þessu tilviki.

Hjónin segja nokkra hafa sýnt áhuga á að kaupa húseignina og vonast þau til að geta flutt burt sem fyrst.

„Við ætlum að halda áfram og reyna að njóta lífsins annars staðar.“