Guðmundur Felix Grétarsson er þakklátur fyrir að hafa fengið hamborgarhrygg og jólaöl til Frakklands. Þar hefur hann búið frá árinu 2013 og bíður eftir að fá ágrædda handleggi. Hann lætur engan bilbug á sér finna og fagnar hátíðinni með eiginkonunni Sylwia Nowakowska og hundunum þeirra tveimur.
Hvernig verður aðfangadagskvöld hjá þér?
Aðfangadagskvöld verður með nokkuð hefðbundnu sniði hjá mér í ár. Ég verð heima hjá mér ásamt konunni minni og hundunum. Við fáum svo eina vinkonu okkar og son hennar í mat til okkar.
Hvað borðar þú í kvöld?
Mér tókst, þrátt fyrir óvenjulegar aðstæður, að fá hamborgarhrygg hingað út og kippu af jólaöli. Sem betur fer er ég sá eini í hópnum sem kann að meta jólaölið og get því sluprað því öllu í mig einn.
Verður þetta ólíkt fyrri aðfangadagskvöldum?
Þetta aðfangadagskvöld er ósköp svipað þeim sem ég hef átt síðan ég flutti hingað út fyrir utan að við eru ívið færri í ár. Í fyrra var ég með eldri dóttur mína, Rebekku, og sú yngri heimsótti okkur ásamt barnabarninu í desember það ár. Ég verð, eins og svo margir aðrir, að hitta þær á Skype að þessu sinni.
Hvað langar þig mest að fá í jólagjöf?
Þegar ég er spurður um óskajólagjöfina kemur alltaf fyrst í huga blessaðir handleggirnir sem ég er alltaf að bíða eftir en þar sem ég óska engum að missa ástvin á þessum tíma þá er ég mest ánægður með jólamatinn sem Diljá dóttir mín og unnusti hennar gáfu mér.
