Það er aldeilis hressilegt bíókvöld í vændum hjá unnendum hryllingsmynda, annað kvöld í Bíó Paradís, en á Alþjóðlegri kvikmyndahátíð í Reykjavík (RIFF) verður hryllingsmaraþon þar sem skelfilegri skemmtun er lofað – bæði innan og utan sýningartjaldsins. RIFF hefur formlega göngu sína frá og með deginum í dag og stendur til sunnudagsins 6. október. Hægt er að útvega sér passa á hátíðina með því að smella HÉR.
Úrval hryllingsmaraþonsins samanstendur af ýmsum ólíkum kvikmyndum, bæði stuttmyndum og í fullri lengd, og standa herlegheitin í gangi frá klukkan 21:00 til 03:00. Gunnar Theodór Eggertsson, sérfræðingur í hryllingsmálum og yfirmaður hryllingsmyndaflokksins á RIFF, lofar ógleymanlegru kvöldi þar sem miklu verður tjaldað til.
„Það hefur alltaf verið hefð á kvikmyndahátíðum að bjóða upp á miðnæturbíó,“ segir Gunnar. „Þetta er okkar tilraun til að hræra saman ýmsum ólíkum en vel völdum myndum og langaði okkur að halda norrænu þema þetta árið. En það verður gaman að sjá hvernig fólk tekur í þetta og alltaf mikil stemning að sjá fjölda góðra mynda á einu bretti.“
Þetta er það sem verður á boðstólnum blóðuga á maraþoninu:
Leikstjórinn Jim Jarmusch er fjölmörgum kunnugur og útfærir hann hér sína fyrstu uppvakningamynd. Segja má að þessi mynd, sem aðdáendur leikstjórans hafa lengi beðið spenntir eftir, sé bæði óhugnanleg og hnyttin í senn og er enginn skortur af þekktum leikurum á skjánum. Myndin gerist í rólegum og friðsömum bæ að nafni Centerville, sem tekur stakkaskiptum þegar íbúar neyðast til að takast á við hjarðir fólk sem hefur risið upp úr gröfum sínum. Hvað gera bændur þá?
Little Joe í leikstjórn Jessicu Hausner gerist í framtíðinni og fjallar um óhugnanleg áhrif erfðabreytinga. Leikararnir Ben Whishaw og Emily Beecham fara með helstu hlutverk í myndinni sem vakið hefur mikla athygli um allan heim.
Stuttmyndin Þula er rómantísk vísindafantasía eftir Hauk M. Hrafnsson þar sem ótrúleg þrautseigja manns fléttast inn í heim vísindaskáldskapar. Tíminn leysist upp og víddir teygjast og sveigjast á meðan hann glímir við örlögin. Myndin keppir á RIFF í flokki íslenskra stuttmynda og verður Haukur sjálfur á staðnum undir lok sýningar til að svara spurningum aðdáenda.
Sænska költ-myndin Evil Ed frá Anders Jacobson er óður til sígildra „splatter-mynda“ níunda áratugarins og í senn bráðfyndin ádeila á sænska ritskoðunarkerfið. Myndin segir frá ljúfa klipparanum Ed, sem er auðmjúkur og listrænn að eðlisfari sem dag einn fær það verkefni að ritskoða hrollvekjur allan daginn. Verkið virðist við fyrstu sýn vera sáraeinfalt en fyrr en varir er Ed hægt og rólega farinn að missa vitið.
„Þetta er eina gamla myndin sem við sýnum og langaði okkur að taka eina sem væri ekkert sérlega þekkt, en hún er rosalega skemmtileg.“
Sjá einnig: Blóð í bíó: „Það er sjaldgæf ánægja að finna mynd sem er svo innilega furðuleg“
