fbpx
Þriðjudagur 15.október 2019  |

DV - Frjáls og óháður miðill

Fókus

Blóð í bíó: „Það er sjaldgæf ánægja að finna mynd sem er svo innilega furðuleg“

Lilja Katrín Gunnarsdóttir
Laugardaginn 21. september 2019 21:00

Úr myndinni The Dead Don't Die.

Ekki missa af Helstu tíðindum dagsins í pósthólfið þitt

Lesa nánar

Hryllingsmyndir njóta síaukinna vinsælda hjá kvikmyndahúsagestum – Á kvikmyndahátíðinni RIFF er að finna úrval fyrir aðdáendur blóðs, uppvakninga og hryllings.

The Dead Don’t Die

Leikstjórann Jim Jarmusch þarf vart að kynna en hann hefur leikstýrt myndum á borð við Night on Earth, Broken Flowers, Coffee and Cigarettes, Stranger Than Paradise og Only Lovers Left Alive. The Dead Don’t Die er hins vegar hans fyrsta uppvakningamynd, og myndin var frumsýnd á kvikmyndahátíðinni í Cannes í maí síðastliðnum og sló rækilega í gegn. Myndin virðist höfða meira til Evrópubúa en samlanda Jarmusch, Bandaríkjamanna, og hefur hún hlotið ansi misjafna dóma gagnrýnenda. Það þarf hins vegar lítið að kvarta yfir leikaravalinu og skartar myndin stórstjörnunum Adam Driver, Bill Murray, Tilda Swinton, Steve Buscemi og Chloë Sevigny.

Í stuttu máli fjallar myndin um lögreglulið í smábænum Centerville sem þarf skyndilega að verjast innrás uppvakninga. Þótt um hryllingsmynd sé að ræða er húmorinn alltaf til staðar og leikur Jarmusch sér til að mynda með frægar persónur í uppvakningalíki. Eins og gagnrýnandi BBC bendir á þá virðist Jarmusch vera að vísa í nútímaheiminn þar sem leikararnir í The Dead Don’t Die virðast vera meðvitaðir um að þeir séu fastir í uppvakningamynd og að þeir geti lítið í því gert.

Einkunnir

Metacritic: 54/100
iMDB: 5,6/10
Rotten Tomatoes: 54/100

Það vantar ekki hæfileikana í leikaraliðið í The Dead Don’t Die.

Dachra

Frá túniska leikstjóranum Abdelhamid Bouchnak kemur hryllingsmyndin Dachra, sem er fyrsta mynd leikstjórans í fullri lengd og í raun fyrsta hryllingsmyndin frá Túnis. „Karakterarnir eru pirrandi, útlitið ódýrt og söguþráður endurunninn úr öðrum kvikmyndum sem samt þarf að viðurkenna að Dachra er ógeðfelld spennumynd,“ stendur til að mynda í gagnrýni Hollywood Reporter. Þótt myndin sé ekki gallalaus þá er hún allt öðruvísi en aðrar myndir frá Túnis og svalar þörf áhugafólks um hryllingsmyndir.

Myndin fjallar um Yasmin, nema í blaðamennsku, sem ákveður að gera skólaverkefni um dularfulla konu sem fannst limlest fyrir 25 árum. Yasmin gerir verkefnið ásamt tveimur vinum, en dularfulla konan er læst inni á hæli og grunuð um galdur. Skólaverkefnið dregur þau í óvæntar og ógnvænlegar áttir í einangruðu þorpi, fullu af geitum, þöglum konum, dularfullu þurru kjöti og sjóðandi pottum.

Einkunnir

Metacritic: ?
iMDB: 7,1/10
Rotten Tomatoes: 100/100

Dachra er fyrsta hryllingsmyndin frá Túnis.

The Lighthouse

Frá leikstjóranum Robert Eggers kemur svarthvíta hrollvekjan The Lighthouse. Eggers er ekki ókunnugur hryllingsmyndum því hann kom sér rækilega á kortið með hryllingsmyndinni The Witch árið 2015. The Lighthouse var heimsfrumsýnd á kvikmyndahátíðinni í Cannes í maí og hlaut lof gagnrýnenda. Þá er það mál manna að aðalleikararnir Robert Pattinson og Willem Dafoe sýni stórleik í myndinni, sérstaklega sá síðarnefndi, gamalreyndi jálkur.

„Það er sjaldgæf ánægja að finna mynd sem er svo innilega furðuleg að maður veit ekki hvernig á að skilgreina það sem maður var að horfa á,“ segir til að mynda í gagnrýni New York Post um myndina, sem fjallar um ævintýri tveggja vitavarða. Vitaverðirnir hafa eytt alltof löngum tíma í vitanum og verða hægt og bítandi sturlaðir á afskekktri eyju við Nýja-England. Hrollvekjan er sálræn og tekin upp á 35 millimetra, svarthvíta filmu, sem gerir hana enn meira hrollvekjandi.

Einkunnir

Metacritic: 89/100
iMDB: 7,9/10
Rotten Tomatoes: 94/100

Willem Dafoe og Robert Pattinson fara á kostum í The Lighthouse.

Evil Ed

Svo er það ein gömul og góð, sænska hryllingskómedían Evil Ed frá árinu 1995 í leikstjórn Anders Jacobsson. Myndin er háðsádeila á þá miklu ritskoðun sem gekk á í Sænsku kvikmyndastofnuninni á árunum 1911 til 1996. Aðalpersóna myndarinnar, Ed, er látin ritskoða hrollvekjur allan liðlangan daginn og byrjar smátt og smátt að missa vitið.

Um er að ræða svokallaða költmynd sem er einnig óður til subbumynda níunda áratugarins. Hins vegar var það ádeilan sem kom henni í kortið og var Anders Jacobsson sjálfur til að mynda hafður að háði og spotti í sænsku sjónvarpi af Sænsku kvikmyndastofnuninni þegar að myndin kom út.

Einkunnir

Metacritic: ?
iMDB: 5,6/10
Rotten Tomatoes: ?

Evil Ed er háðsádeila mikil.

Hryllingur í minna mæli

Á RIFF er einnig að finna ýmsar stuttmyndir með hryllingsívafi, svo sem Hand in Hand frá Sviss, Milk frá Kanada og Helsinki Mansplaining Massacre frá Finnlandi.

Helsinki Mansplaining Massacre er meðal stuttmynda í hryllingsgeiranum á RIFF.

Milljarðaiðnaður

Árið 2018 var einstaklega gott ár fyrir hryllingsmyndir og virðist sú tegund kvikmyndagerðar vera á mikilli uppleið. Hryllingsmyndir skiluðu rétt rúmlega níu hundruð milljónum dollara í miðasölutekjur árið 2018, um 111 milljörðum króna. Alls voru seldar tæplega hundrað milljónir miða á hrollvekjur það árið. Þær þrjár myndir sem höluðu mestu inn voru:

1. A Quiet Place
Tekjur: 188 milljónir dollara
Miðar seldir: 20 milljónir

2. Halloween
Tekjur: 159 milljónir dollara
Miðar seldir: 17,5 milljónir

3. The Nun
Tekjur: 117 milljónir dollara
Miðar seldir: 13 milljónir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fókus
Fyrir 2 dögum

Albert segir óþægilegar sögur uppi á sviði: „Birta ekkert endilega bestu ímyndina af mér”

Albert segir óþægilegar sögur uppi á sviði: „Birta ekkert endilega bestu ímyndina af mér”
Fókus
Fyrir 2 dögum

Hjörvar Ingi fór í fyrsta sinn á veiði 5 ára: „Þetta er kannski svona skólabókardæmi um mynd sem er falleg“

Hjörvar Ingi fór í fyrsta sinn á veiði 5 ára: „Þetta er kannski svona skólabókardæmi um mynd sem er falleg“
Fókus
Fyrir 4 dögum

Sjáðu myndbandið: Krúttlegustu börnin í hæfileikakeppnum – Trommari, plötusnúður og dansari

Sjáðu myndbandið: Krúttlegustu börnin í hæfileikakeppnum – Trommari, plötusnúður og dansari
Fókus
Fyrir 4 dögum

Breaking Bad kvikmyndin kemur á Netflix á morgun

Breaking Bad kvikmyndin kemur á Netflix á morgun