Einleikurinn Ég dey eftir Charlotte Bøving verður frumsýndur 10. janúar í Borgarleikhúsinu. Í sýningunni veltir Charlotte fyrir sér dauðanum, af hverju við hræðumst hann og hversvegna hann sé svona mikið tabú.

Þegar Charlotte Bøving varð fimmtug uppgötaði hún sér til mikillar undrunar að hún myndi deyja. Hún hafði aldrei áttað sig á þessari staðreynd og í raun aldrei velt dauðanum fyrir sér. Í framhaldi af þessari uppgötvun varð sýningin Ég dey til. Í sýningunni veltir Charlotte fyrir sér ýmsum hliðum dauðans og skoðar lífið með augum hans. Afhverju er dauðinn svona mikið tabú, hversvegna við hræðumst hann svona mikið og hvernig hann getur styrkt okkur í lífinu?

Mantra verksins er í raun og veru „Það er best að gera hlutina núna, við erum hvort eð er að deyja“.

Í sýningunni mun Charlotte ögra sér og áhorfendum og framkvæma fimm hluti á sviðinu sem að hún hefur aldrei þorað að gera áður.

Ég dey er þriðji einleikur Charlotte en fyrri tveir, Hin smyrjandi jómfrú (2002) og Þetta er lífið – og nu er kaffen klar (2010) voru báðar tilnefndar til Grímunnar. Charlotte hefur undanfarin ár verið áberandi leikkona á sviði, í kvikmyndum og í sjónvarpi, hún hefur leikstýrt fjölda leiksýninga, bæði fyrir börn og fullorðna og verið dramatúrg í verkum. Hún hefur hlotið fjölda verðlauna og tilnefninga fyrir verk sín, bæði hér heima og erlendis.

Charlotte semur og flytur Ég dey. Benedikt Erlingsson með-leikstýrir verkinu, Gréta Kristín Ómarsdóttir er dramatúrg, Þórunn María Jónsdóttir sér um leikmynd og búninga, Gísli Galdur sér um tónlist. Steinar Júlíusson hannar myndbönd sýningarinnar, Garðar Borgþórsson hannar lýsingu og Unnur Elísabet Gunnarsdóttir sér um sviðshreyfingar.