Fjölmenn dómnefnd, þverskurður af þjóðinni valdi þau sem sköruðu fram úr á árinu:

Sigurvegari ársins er Inga Sæland sem öllum á óvörum er orðin ráðherra.

Duglegasti maður ársins er Arnar Þór Jónsson. Eftir dapurlegar forsetakosningar hélt hann ótrauður í alþingiskosningar með nýstofnaðan stjórnmálaflokk. Árangurinn varð síst betri en hann lét aldrei deigan síga.

Hamskiptakona ársins er Halla Hrund Logadóttir sem breyttist úr orkumálastjóra í forsetaframbjóðanda og þaðan í þingmann. Eftirspurn eftir konunni fór þó hratt minnkandi á árinu.

Þingmaður ársins er ræðukóngurinn Björn Leví sem talaði Pírata út af þingi.

Ofnotaðasti maður ársins er stjórnmálaprófessorinn frá Bifröst, Eiríkur Bergmann. Honum hefur tekist að gera sig ómissandi í allri fjölmiðlaumræðu um ólíkustu efni.

Ofmetnasti álitsgjafi landsins er Henry Alexander Henrysson siðfræðingur sem hefur aflað sér mikilla vinsælda í fjölmiðlum fyrir afdráttarlaus svör. Honum finnst að öllum sem verður einhver fótaskortur á hálu svelli almannasamskipta skuli sagt upp tafarlaust.

Íþróttamaður ársins er hinn geðþekki Albert Guðmundsson sem spilar hverja framlenginguna á fætur annarri í réttarsölum landsins.

Bölsýnasti jarðfræðingur ársins er Þorvaldur Þórðarson sem sér tímamótamarkandi hamfarir í minnstu jarðhræringum. Hann spáir því reglulega að Keflavíkurvegur fari undir hraun og allt orkukerfi landsmanna hrynji.

Plott ársins var fyrirætlan útvarpsstjóra að senda Palestínumann í Eurovision fyrir Íslands hönd og vinna keppnina á samúðaratkvæðum.

Þrjóskasti maður landsins er Ástþór Magnússon sem lagði í enn einar forsetakosningar með sömu niðurstöðu og fyrr.

Starfsmaður ársins er Helgi Magnús hjá embætti ríkissaksóknara.

Vælukjói ársins er Jóhannes Skúlason talsmaður ferðaþjónustu sem grætur reglulega og beisklega í fjölmiðlum yfir meðferð á ferðamönnum.

Dýr ársins er hvalur sem tekst að kljúfa samfélagið í herðar niður á hverju ári.

Sjarmatröll ársins var ísraelski leyniþjónustumaðurinn sem heillaði reykvískan fasteignasala með töfrandi framkomu sinni.

Taparar ársins eru VG sem tókst að þurrka sig út af kortinu vandræðalaust.

Kvíði ársins er drægnikvíði eigenda rafbíla.

Hetjur ársins eru starfsfólk á bráðamóttöku Landspítalans sem hafa staðið vaktina í gegnum þykkt og þunnt og ekki látið svartagallsrausið spilla starfsgleði sinni.