Bjarni Jónsson, þingmaður Vinstri grænna, er sá þingmaður sem eyddi mest af skattfé landsmanna til þess að ferðast út fyrir landsteinanna á síðasta ári. Alls kostuðu ferðalög Bjarna rétt tæpar 4,5 milljónir króna á síðasta ári og ber hann höfuð og herðar yfir aðra þingmenn. Þetta kemur fram í úttekt Viðskiptablaðsins á ferðakostnaði þingmanna sem birtist í dag.

Þar er einnig bent á þá kostulegu staðreynd að Bjarni er bróðir Ásgeir Jónssonar, seðlabankastjóra, sem meðal annars afsakaði vaxtahækkanir Seðlabankans með því að íslensk heimili væru að eyða sparnaði sínum í ferðalög og birta tásumyndir á samfélagsmiðlum.

Ólíklegt er að Bjarni hafi birt slíkar myndir af sér á ferðalögunum en hann eyddi 1,2 milljónum meira af fjármunum skattgreiðenda en næsti þingmaður, Bryndís Haraldsdóttir sem situr á þingi fyrir Sjálfstæðisflokkinn.

Í umfjöllun Viðskiptablaðsins kemur meðal annars fram að Ríkissjóður hafi að öllum líkindum lagt út um 300 milljónir í ferðalög þingheims og Stjórnaráðsins í fyrra og sú upphæð sé líklega yfir milljarð á kjörtímabilinu öllu. Það sé á sama tíma og að ríkissjóður er rekinn í bullandi mínus og tilefni til að velta við öllum steinum í stjórnkerfinu til að spara kostnað.

Topp 10 listi þeirra þingmanna sem hafa eytt mestu í ferðalög

Bjarni Jónsson – Vinstri græn – 4.483.482
Bryndís Haraldsdóttir – Sjálfstæðisflokki  3.203.261
Njáll Trausti Friðbertsson – Sjálfstæðisflokki – 3.014.053
Birgir Þórarinsson – Sjálfstæðisflokki – 2.834.789
Þórhildur Sunna Ævarsdóttir – Pírötum – 2.411.002
Jóhann Friðrik Friðriksson – Framsóknarflokki – 2.399.177
Áslaug Arna Sigurbjörnsdóttir – Sjálfstæðisflokki – 1.988.286
Guðrún Hafsteinsdóttir – Sjálfstæðisflokki-  1.973.336
Guðbrandur Einarsson – Viðreisn – 1.939.340
Þorgerður Katrín Einarsdóttir – Viðreisn – 1.836.950