Þetta hefur Morgunblaðið eftir Má Wolfgang Mixa, lektor í fjármálum við Háskóla Íslands. Hann sagði að fasteignaverð sé nú í sögulegu hámarki út frá öllum mælikvörðum séð og ekki sé ósennilegt að bóla hafi myndast á markaðnum.
„Þótt það séu engar vísbendingar komnar fram um það enn sem komið er, þá er ekki ólíklegt að fasteignaverð taki dýfu niður á við þegar vaxtastig er að hækka og væntingar eru uppi um aukið framboð,“ sagði hann og benti á að slíkt hafi gerst áður. Til dæmis hafi fasteignaverð lækkað um tæplega 20% frá 2007 til 2010 en á þessum tíma var samanlögð verðbólga um 30%.
Hann sagði að fyrstu merkin um verðlækkanir verði sá tími sem tekur að selja íbúðir. „Um leið og þær tölur fara að hækka, dagar frá því íbúð fer á sölu og þar til hún selst, fást vísbendingar um hvort lækkanir séu í kortunum,“ sagði hann.
