Fréttablaðið skýrir frá þessu í dag. Haft er eftir honum að nú séu skrítnir tímar hvað þetta varðar. Hann sagði að fordæmalausar hækkanir hafi orðið á allri hrávöru, til matvæla- eða iðnaðarframleiðslu, frá því seint á síðasta ári. Við þetta bætist hækkanir á flutningskostnaði sem séu einnig miklar.
Þetta mun að hans sögn leiða til þess að allt viðskiptaumhverfið og þar með almenningur finni fyrir áhrifum þessara verðhækkana. „Þetta hefur óhjákvæmilega áhrif inn í allt efnahagslífið, með tilheyrandi áhrifum á heimili í landinu,“ sagði hann. Hann sagði einnig að samkvæmt því sem Alþjóðabankinn og aðrir greiningaraðilar segi þá muni þetta ástand líklega versna enn frekar áður en það batnar og muni vara fram á vor.
Auður Alfa Ólafsdóttir, verkefnisstjóri verðlagseftirlits ASÍ, sagði ástæðu til að hafa áhyggjur af því að verðbólga sé töluð upp, umræða um verðhækkanir á hrávöru geti leitt til verðbólgu og grafið undan peningastefnunni. „Nauðsynlegt er að hafa í huga að hækkun á hrávöruverði á ekki að leiða sjálfkrafa til verðhækkana á vöru og þjónustu,“ sagði hún bætti við að oft sé um tímabundnar sveiflur að ræða og hrávöruverð sé ekki stór hluti af endanlegu verði.