Hinn þekkti Bakþankahöfundur Fréttablaðsins, Haukur Örn Birgisson, segir erfðafjárskatt vera með ógeðfelldari tekjuöflunarleiðum ríkissjóðs. Með honum séu eftirlitandi ættingjar látnir greiða tíu prósent af eignum sem látinn ástvinur hefur þegar greitt skatt af. Þetta kemur fram í nýjast pistli Hauks í Fréttablaðinu. Þar segir:

„Þeir, sem auðnast að skilja eftir einhverjar veraldlegar eigur fyrir afkomendur sína, hafa auðvitað margsinnis á lífsleiðinni greitt skatta af þessum sömu eigum. Það er ekki nóg, að mati ríkisins. „Við skulum klípa 10% í viðbót af líkinu,“ segir í lögunum – ef ég leyfi mér að umorða lagatextann örlítið.“

Haukur segir það góð tíðindi að nú standi til að lækka þennan skatt eitthvað. En hinir skattsjúku megi ekki heyra á það minnst:

„Það kemur ekki á óvart að hinir skattsjúku skuli leggjast gegn lækkuninni. Þeir segja engin rök hafa verið færð fram fyrir henni, án þess að hafa sjálfir reynt að réttlæta þennan ömurlega skatt til að byrja með. Lækkunin mun „kosta“ ríkissjóð tvo milljarða á ári, segja þeir. Þetta er mjög undarleg nálgun en á sama tíma klassísk. Það er engu líkara en að laun vinnandi fólks tilheyri fyrst ríkinu og síðan þeim sem strita fyrir þeim. Að stjórnmálamennirnir hafi það hlutverk að útdeila laununum til fólksins, eftir að ríkið hefur tekið sitt. Ef einhverjum dettur í hug að lækka skatta þá líta hinir svo á að ríkið sé að gefa eftir sína fjármuni! Þessu er vitaskuld þveröfugt farið.“