Sunnudagur 17.nóvember 2019
Eyjan

Biskup hefur ekki áhyggjur af fækkun í þjóðkirkjunni

Ritstjórn Eyjunnar
Föstudaginn 4. október 2019 09:28

Agnes M. Sigurðardóttir, biskup Íslands

Ekki missa af Helstu tíðindum dagsins í pósthólfið þitt

Lesa nánar

Líkt og Eyjan greindi frá í gær hefur meðlimum Þjóðkirkjunnar fækkað um 988 manns það sem af er á þessu ári. Það jafngildir því að þrír segi sig úr henni á degi hverjum.  Hlutfall landsmanna í Þjóðkirkjunni hefur aldrei verið lægra en um þessar mundir.

Frá árinu 2009 hefur meðlimum þjóðkirkjunnar fækkað um rúmlega 20 þúsund manns, en á meðan hefur verið hröð fjölgun landsmanna, alls 36 þúsund manns, sem virðist ekki skila sér til þjóðkirkjunnar. Alls voru 92,2 prósent landsmanna í þjóðkirkjunni árið 1992 en hlutfallið nú er um 65%.

Engar áhyggjur

Morgunblaðið hefur eftir samskiptastjóra Biskupsstofu í dag, að Agnes M. Sigurðardóttur biskup, hafi ekki áhyggjur af þessari þróun, henni væri fyrst og fremst umhugað um „einlægt, andlegt trúarlíf almennings, velferð og sálgæslu sem hverjum og einum einstaklingi væri mikilvægust.“

42 milljarðar á 20 árum

Þjóðkirkjan er á fjárlögum og fékk um 5,5 milljarða króna frá skattborgurum landsins árið 2018. Þá munu framlög ríkisins til þjóðkirkjunnar aukast um 857 milljónir á næsta ári samkvæmt fjárlögum.

Í stjórnarskrá nýtur þjóðkirkjan stuðnings og verndunar ríkisvaldsins umfram önnur trúfélög. Þá er enn í gildi kirkjujarðarsamkomulagið frá 1997 sem fól í sér að ríkið tók yfir um 600 kirkjujarðir, gegn því að greiða laun presta og starfsmanna Biskupsstofu.

Frá því að samkomulagið tók gildi, árið 1998, hefur ríkið greitt þjóðkirkjunni samtals 42 milljarða króna, þar af eru um 40 milljarðar laun til presta, eða um tveir milljarðar á ári.

Fjöldi presta hér á landi telja um 140 manns.

Þá hefur meirihluti almennings kallað eftir aðskilnaði ríkis og kirkju nánast samfleytt frá árinu 1993, í könnunum þess efnis. Í október 2018 voru 54 prósent Íslendinga hlynnt aðskilnaði ríkis og kirkju, samkvæmt Þjóðarpúlsi Gallup.

Í sömu könnun kom fram að þriðjungur þjóðarinnar bæri mikið traust til þjóðkirkjunnar, sem var fækkun um tíu prósentustig milli ára. Alls 39 prósent sögðust bera lítið traust til þjóðkirkjunnar.

Ánægjan með störf biskups hefur aldrei verið minni samkvæmt sömu könnun. Aðeins 14 prósent sögðust ánægð með störf biskups, en 44 prósent sögðust óánægð.

Sjá nánar: Ríkið hefur greitt kirkjunni 42 milljarða á 20 árum fyrir kirkjujarðir – „Ómögulegt“ að vita verðmætið

Sjá nánar: Hlutfall landsmanna í þjóðkirkjunni aldrei lægra en nú – Prestar þegið 40 milljarða í laun síðan 1998

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af