„Annaðhvort er hún í lyfjagjöf eða í hvíld og þá er hún lasin eftir lyfjagjöfina. Maður er alltaf að halda í von að maður geti farið og gert eitthvað saman sem fjölskylda, en maður gleymir að hlúa að sjálfum sér af því maður er svo upptekinn af því að passa upp á hana og að henni líði vel, og börnunum hennar,“

segir Ástrós Villa Vilhelmsdóttir um systur sína sem glímir við briskrabbamein.

„Hún greindist jólin 2017-18, var búin að vera mikið veik áður og kom í ljós þarna að hún var með briskrabbamein, fór í stóra aðgerð og lyfjameðferð eftir það. Hún er búin að vera með krabbameinið síðan þá og er enn að berjast.“

Ástrós segir sögu sína í tilefni af Bleiku slaufunni, árlegu árvekni- og fjáröflunartátaki Krabbameinsfélagsins, sem jafnan fer fram í október. Bleika slaufan er komin út í 25 sinn, hönnuð af Sigríði Soffíu Níelsdóttur, Siggu Soffíu, sem greindist brjóstakrabbamein árið 2020 og þurfti að fara í lyfja- og geislameðferð og aðgerð.

Ástrós sem býr á Norðurlandi leitaði sér aðstoðar núna í janúar hjá Krabbameinsfélaginu.

„Ég gekk inn mölbrotin á líkama og sál,“ segir Ástrós sem segir hafa verið tekið vel á móti henni og alltaf tekið jafnvel á móti henni og fylgst vel með að henni líði vel. Engu máli skipti hvar fólk sé búsett sem þarf að leita sér aðstoðar hjá Krabbameinsfélaginu.

„Ef það væri einhver að greinast í dag þá myndi ég svo sannarlega vilja að sá sami myndi fara og leita sér aðstoðar.“