Live Science skýrir frá þessu og segir að með því að greina prótín í blóði sé hugsanlega hægt að greina Parkinsonssjúkdóminn miklu fyrr en nú er.
Í prófinu er skoðað hvort prótín safnist öðruvísi saman en hjá þeim sem ekki eru í hættu á að fá sjúkdóminn. Með samspili prófsins og gervigreindar gátu vísindamenn sagt til um hvaða sjúklingar höfðu verið greindir með Parkinsonssjúkdóminn og hverjir ekki. Þeir gátu einnig sagt til um hverjir eru í áhættuhópi og eiga á hættu að þróa sjúkdóminn með sér.
„Við þurfum að greina sjúklinga áður en sjúkdómseinkennin koma fram,“ sagði Kevin Mills, aðalhöfundur rannsóknarinnar og prófessor við University College London í yfirlýsingu. Hann benti á að nú fá flestir meðferð við sjúkdómnum eftir að þeir byrja að sýna sjúkdómseinkenni en það sé of seint. „Við getum ekki látið heilafrumur okkar vaxa aftur og þess vegna verðum við að vernda þær sem við erum með,“ sagði hann einnig.
Parkinsonssjúkdómurinn herjar á rúmlega 8,5 milljónir manna um allan heim og verður um 300.000 manns að bana árlega. Þessar tölur hækka með hverju árinu.
