Vísindamenn segja að þeir hafi fundið upp sterkara og áhrifaríkara lyf en Ozempic. Um er að ræða nýja notkun á GLP-1, hormóni sem líkaminn framleiðir náttúrulega eftir máltíð.

Á vef Lyfju kemur fram: „Ozempic inniheldur virka efnið semaglútíð. Semaglútíð er sykursýkislyf og tilheyrir flokki glúkagonlík-peptíð-1 (GLP-1) hliðstæðna. Lyfið líkir eftir náttúrulega hormóninu GLP-1 sem er losað úr þörmum eftir máltíðir og hefur margvísleg áhrif á stjórnun glúkósa og matarlyst. Semaglútíníð hjálpar líkamanum að minnka magn blóðsykurs, eingöngu þegar blóðsykurinn er of hár. Einnig hefur lyfið þau áhrif að minniháttar seinkun verður á magatæmingu fyrst eftir máltið og þú finnur fyrir seddutilfinningu, minna hungri og minnkar löngun í fituríkan mat. Þetta getur hjálpað þér við að borða minna og draga úr líkamsþyngd.“

Þetta nýja lyf lætur GLP-1 virka eins og trójuhest sem laumar sérstökum sameindum beint í matarlystarstjórnstöð heilans.

Rannsóknin var aðeins framkvæmd á músum. Einn hópur fékk bæði hormónið og sameindirnar, og þær mýs léttust meira en þær sem tóku lyf sem eru þegar á markaði.

„Áhrifin af GLP-1 þegar þessar sameindir eru settar með eru mjög sterk. Í sumum tilvikum misstu mýsnar tvöfalt meira heldur en mýs sem voru aðeins í GLP-1 meðferð,“ sagði einn höfundur rannsóknarinnar, Christoffer Clemmensen. Hann er prófessor hjá Novo Nordisk Foundation Center við Kaupmannahafnarháskóla. Novo Nordisk framleiðir bæði Ozempic og Wegovy.

Langt í að almenningur fær að sjá lyfið

Fólk missir yfirleitt um 15 til 20 prósent af líkamsþyngd sinni á Ozempic, eða svipuðum lyfjum. En um þriðjungur notenda missir aðeins um tíu prósent.

Clemmensen sagði að þessi nýja meðferð gæti hjálpað sjúklingum að ná fram sömu áhrifum með lægri skammti. Einnig gæti þetta verið betri lausn fyrir fólk sem bregst illa við lyfjum sem eru nú þegar til.

Hann sagði að aukaverkanir nýju meðferðarinnar væru svipaðar og hjá Ozempic og Wegovy: Ógleði, niðurgangur, magaverkur, uppköst og hægðatregða.

„En því lyfið er svo áhrifaríkt þá gæti hugsanlega fólk verið á minni skammti og þannig þurft að glíma við minni aukaverkanir,“ sagði hann en tók fram að þessi nýja meðferð hefur aðeins verið prófuð á músum og ekki er vitað hvernig mannfólk mun bregðast við lyfinu.

Lyfið þarf að gangast undir klínískar lyfjarannsóknir á mannfólki og sagði Clemmensen að það gætu verið allt að átta ár þar til það yrði aðgengilegt fyrir almenning.