Hún segir allt of marga gera sömu mistökin, að horfa ekki í linsuna. Hún segir það ekki aðeins gefa til kynna að fólk kunni ekki að taka góða mynd, heldur sé það vísbending um að viðkomandi sé óöruggur og of meðvitaður um eigið útlit. Hún útskýrir þetta í pistli á Vísi.
„Þetta var ekki vandamál fyrr en símar tóku við myndavélunum og við fórum öll að taka mynd af sjálfum okkur. Áður fyrr þá var fólk með myndavélar og þá horfði maður í átt að linsu á myndavélinni á meðan einhver annar tók af manni myndina. Það sama á við um símann, á honum er linsa og það er vert að leita að henni á símanum. Á mínum iPhone er hún þarna efst, vinstra megin við miðju,“ segir Anna Gunndís.
„Annars eru hér heilu kynslóðirnar að taka af sér mynd og stara á sjálf sig á meðan myndin er tekin: ÞAÐ ER RANGT. HORFA SKAL Í LINSUNA. EKKI Á MYNDINA SEM BIRTIST Á SKJÁNUM, HELDUR Í LINSU.
Annars lítiði öll út fyrir að vera að fá heilablóðfall. Það kemst alltaf upp um þig. Meðvitundin um eigið útlit að drepa þig. Horfðu í linsuna! Útkoman verður betri! Ég sver það!“
Anna Gunndís útskýrir einnig hvernig best sé að tækla ljósmyndakassa sem er vinsælt að hafa í veislum.
„SAMA AÐFERÐ! HORFA Í LINSU! Það er oft svona miði sem á stendur „LOOK HERE!“. Það þýðir HORFA HÉR! Í linsuna! Þetta er afkáralegt á hópmyndum þegar helmingur hópsins horfir á sjálfan sig og hinn helmingurinn horfir á „LOOK HERE!“. Það kemst þá upp um þau óöruggu með sjálfsefann og meðvitundina, bara geta ekki annað en athugað hvort þau séu ekki ægilega sæt. RANGT, EKKI SÆT HELDUR MEÐ HEILABLÓÐFALLSLÚKKIÐ. En það er allt betra ef þú bara horfir í linsuna.“
Fyrir þau sem þurfa að sjá þetta til að skilja þá birti Anna Gunndís tvær myndir, á vinstri myndinni horfir hún í linsuna.
„Hægri mynd: SJÁLFHVERFT HEILABLÓÐFALL,“ segir hún.
„Nei, ég er ekki vond við þig. Ég er að hjálpa þér. Nú ferðu að skrolla og áttar þig á að allar myndirnar þínar eru ónýtar,“ segir hún að lokum.
