Heimavarnarráðuneytið staðfesti í gær að fulltrúar þeirra hafi gert húsleit á eignum tónlistarmannsins í Los Angeles, Miami og New York.
Ráðuneytið vildi ekki gefa mikið upp varðandi ástæður húsleitarinnar en gaf út stutta yfirlýsingu þar sem kom fram að húsleitin hafi verið gerð í tengslum við „áframhaldandi rannsókn lögreglu“.
Samkvæmt The Guardian er ekki vitað hvort að Diddy sé skotmark rannsóknarinnar. Tónlistarmaðurinn hefur verið sakaður um hrottalegt kynferðisofbeldi og í febrúar var fimmta kæran lögð fram gegn honum fyrir dómstólum.
Áður hafði fyrrverandi kærasta Diddy, Cassandra Venture, stigið fram og kært rapparannn fyrir ítrekuð kynferðisbrot og ofbeldi í nánu sambandi.
Fjórar aðrar konur hafa sakað rapparann um brot gegn sér. Diddy hefur allan tímann haldið fram sakleysi sínu.
Eins og fyrr segir liggur nánari ástæða fyrir húsleitinni ekki fyrir sem stendur en heimildarmaður NBC sagði hana hugsanlega tengjast alríkisrannsókn vegna ásakanna gegn Diddy um mansal, kynferðisbrot og vörslu og sölu fíkniefna og skotvopna.
Diddy er sagður hafa ætlað að fljúga með einkaþotu til Karíbahafsins þegar lögreglan hóf húsleit. Hins vegar er ekki vitað hvort það hafi gengið eftir.
#TMZ has the first video of #Diddy after his homes were raided by the feds Monday — he was caught pacing around Miami airport. https://t.co/F84js7uo79 pic.twitter.com/vGSlxBrtNX
— TMZ (@TMZ) March 26, 2024
TMZ birti myndband af rapparanum fyrir utan flugvöllinn, en samkvæmt NBC lögðu fulltrúar heimavarnarráðuneytisins hald á farsíma Diddy á flugvellinum en ekki er vitað hvort rapparinn hafi farið aftur um borð. Hvorki lögreglan né talsmenn Diddy hafa staðfest það við fjölmiðla vestanhafs.
Myndefni sem Fox 11 hefur undir höndum má sjá vopnaða alríkismenn fara inn á heimilin í Miami og Los Angeles og koma aftur út með nokkra menn í handjárnum.
