Breska konungsfjölskyldan hefur birt fyrstu opinberu myndina af Kate Middleton eftir að prinsessan undirgekkst skurðaðgerð á kviði þann 16. janúar síðastliðinn. Langt hlé Kate frá sviðsljósinu síðan gerði það að verkum að slúðursögur fóru á flug um að ástand hennar væri alvarlegra en af væri látið.

Ljóst er að konungsfjölskyldan hefur talið að nú þyrfti að slá á orðróminn og því fór mynd í loftið þar sem sjá má prinsessuna brosandi í faðmi barna sinna, George, Louis og Charlotte. Er myndin sögð tekin af eiginmanni prinsessunnar, Vilhjálmi Bretaprins.

Breska pressan bar myndina að sjálfsögðu undir sérfræðinga sem virtust ánægðir með þau duldu skilaboð sem komið væri á framfæri á henni. Prinsessan væri greinilega á góðum batavegi og myndin gæfi tilefni til bjartsýni bresku þjóðarinnar um að allt myndi fara vel.