Jógvan Hansen tónlistarmaður með meiru og systir hans, auk maka þeirra, leigja út einstakt sumarhús á Airbnb. Sumarhúsið er byggt í ár sem sumardvalarstaður þeirra í heimabæ systkinanna, Klaksvík í Færeyjum, en öðrum gefst kostur á að leigja húsið þegar fjölskyldurnar tvær eru ekki að nota það.

Einstakt útsýni er yfir sjó, fjöll og náttúru.  Nóttin kostar um 29.000 krónur.

Húsið, sem heitir Ásustova eftir móður Jógvans, hentar fyrir fjóra fullorðna og samanstendur af stofu/eldhúsi, svefnherbergi, háalofti með tveimur rúmum og baðherbergi. 

Samkvæmt lýsingu eigenda á Airbnb er húsið í alfaraleið, Bónus og bakarí er hinu megin við götuna, stutt í bílastæði ef maður er á bíl og almenningssamgöngur. Klaksvík er bær með allt til alls, góða veitingastaði, litla bari með skrýtinni lykt og fullt af bátum. „Og ef þér fyrir tilviljun er boðið í te, kaffi eða snaps skaltu ekki hafna boðinu. Fólkið á eyjunni er gimsteinninn. Þú munt eiga erfitt með að yfirgefa Færeyjar aftur. Við vonum að þú njótir kyrrðarstaðarins okkar Ásustova. Komdu fram við það eins og þú myndir koma fram við þitt eigið heimili.“