Fornleifafræðingar í Kasakstan fundu nýlega gröf unglingsstúlku. Gröfin er frá Bronsöld en hún var frá 3200 fyrir Krist til 1000 eftir Krist. Það vakti sérstaka athygli að stúlkan hafði verið grafin með 180 ökklabeinum úr dýrum. Hafa fornleifafræðingarnir sett fram ákveðna kenningu um ástæðuna fyrir því.

Auk beinanna voru bronsdiskur og úthöggvinn froskur hjá stúlkunni. Telja fornleifafræðingarnir að hugsanlega hafi þetta verið sett hjá stúlkunni til að tryggja örugga ferð hennar úr þessum heimi yfir í annan.

Gröfin fannst á svæði, þar sem unnið hefur verið við uppgröft síðan 2017, í Ainabulak. Það er þorp í austurhluta landsins. Þar hafa rúmlega 100 grafir frá Bronsöld fundist. Þar á meðal gröf stúlkunnar en hún fannst í byrjun ágúst að sögn The Astana Times.

Lítið er vitað um stúlkuna en sá fjöldi muna, sem fannst hjá henni, veitir ákveðnar vísbendingar um hlutverk hennar og stöðu í samfélaginu.

Hún var grafin á vinstri hliðinni og var með litla eyrnalokka í báðum eyrum og hálsmen.

Stúlkan var 12 til 15 ára þegar hún lést.