Reiðhjólaverzlunin Berlin flutti í dag í nýtt húsnæði að Háaleitisbraut 58-60. Af því tilefni bauð Berlin til opnunarhátíðar þar sem sett var nýtt Íslandsmet á þrekhjóli að því er næst verður komist, eins og segir í tilkynningu.

Alls 33 gestir hjóluðu samtals 13 km á þeim fjórum klukkustundum sem opnunarhátíðin stóð yfir í dag. Hjólað var á gömlu þrekhjóli frá áttunda áratugnum.

,,Húsnæðið í gömlu bensínstöðinni á Háaleitisbrautinni var orðið of lítið fyrir okkur og þótt sú staðsetning hafi verið skemmtileg þá erum við að fara stutt frá í enn betra og stærra húsnæði. Það hefur verið mjög mikið að gera hér hjá okkur enda er hjólamenning Íslendinga alltaf að eflast og aukast og sífellt fleiri að eignast reið- og rafmagnshjól til að nota sem samgöngutæki,“ segir Jón Óli Ólafsson, eigandi Berlinar.

Allir sem komu og tóku þátt í þrekhjólametinu fóru í pott og geta unnið Ladies Classic vintage reiðhjól. Einnig voru opnunartilboð á reið- og rafmagnshjólum.