Kópavogsskóli hefur sent bréf til foreldra barna í skólanum vegna fréttaflutnings um Ástríði Kristínu Bjarnadóttur sem situr í gæsluvarðhaldi grunuð um umfangsmikil fjársvik gagnvart hundruðum karlmanna.

Í tilkynningunni kemur fram að Ástríði hafi verið sagt upp störfum og muni hún ekki koma aftur til kennslu við skólann.

Sjá einnig: Ástríður sveik þrjár milljónir út úr manni:„Hún er sennilega að ljúga að sjálfri sér og finnst hún ekki hafa gert neitt rangt“

Meint svik Ástríðar komu fyrst í fréttir árið 2016. Hún situr núna í gæsluvarðhaldi vegna rannsóknar á meintum fjársvikum gagnvart 11 karlmönnum fyrir samtals um 25 milljónir króna. Rannsókn lögreglu hefur einnig leitt í ljós að hátt í 400 karlmenn hafa á undanförnum árum lagt inn yfir 200 milljónir á reikninga Ástríðar.

Ástríður hefur kennt við marga skóla undanfarin ár og meðal annars var hún um tíma umsjónarkennari bekkjar í Kópavogi. Viðmælendur DV hafa undrast hvað hún hefur gegnt mörgum störfum sem kennari og spurt hvort skólar kanni ekki bakgrunn starfsmanna áður en þeir eru ráðnir. Við þessari gagnrýni er brugðist í bréfinu frá Kópavogsskóla:

„Við hörmum að sjálfsögðu þá stöðu sem upp er komin. Ég vil þó samt sem áður fullvissa ykkur um að Þegar starfsmaður er ráðinn í vinnu til Kópavogsskóla er skv. ráðningarferli Kópavogsbæjar leitað samþykktar umsækjenda til að kanna hvort einstaklingur sé á sakaskrá. Þar er verið að leita af brotum á hegningalögum. Einnig er alltaf leitað meðmæla. Það er alltaf markmið Kópavogsbæjar að ráða hæfasta einstaklinginn til starfa.“

Sjá einnig: Spilasjúka konan sem situr í gæsluvarðhaldi kennir í grunnskóla í Kópavogi – Móðir þolanda segir hann hafa verið í sjálfsvígshættu

Í póstinum segir ennfremur að Ástríður hafi verið rekin:

„Starfsmaðurinn sem um ræðir er starfsmaður í Kópavogsskóla og hefur verið nafngreindur í fjölmiðlum. Ráðningarsamningi starfsmannsins verður ekki framhaldið og hún mun ekki koma til starfa í skólanum á næsta skólaári. Að öðru leyti er mér ekki heimilt að ræða málefni einstakra starfsmanna.“

Skólinn notar tækifærið og auglýsir eftir kennara:

„Þessu til viðbótar vil ég einnig nefna að nú standa yfir ráðningar í Kópavogsskóla. Ef einhver af ykkur veit um flottan kennara/kennarateymi sem hefðu áhuga á að starfa hjá Kópavogsbæ þá má benda viðkomandi á að við erum að auglýsa á Alfreð.“