Joao Felix var kynntur til leiks sem leikmaður Chelsea í dag. Það gekk þó ekki vandræðalaust fyrir sig.

Felix er á mála hjá Atletico Madrid en fer á láni til Lundúnaliðsins út yfirstandandi leiktíð.

Hann framlengdi við Atletico til 2027 áður en hann fór til Chelsea.

Chelsea borgar 11 milljónir evra í lánsfé fyrir Felix og greiðir öll hans laun þar til í vor.

Þegar Chelsea tilkynnti leikmanninn á Twitter var skrifað #HolaFelix.

Felix er hins vegar portúgalskur, ekki spænskur og hefði því með réttu átt að standa #OláFelix.

Þessu voru knattspyrnuáhugamenn fljótir að átta sig á og létu Chelsea fá það óþvegið. Færslan var lagfærð en þá höfðu mörg þúsund manns séð hana.

Chelsea hefur verið í vandræðum á leiktíðinni og er í tíunda sæti ensku úrvalsdeildarinnar.

Felix hefur verið hjá Atletico síðan 2019 og er hann dýrasti leikmaður í sögu félagsins.