Nokkrir stuðningsmannahópar Celtic hafa lýst yfir andstöðu sinni við mögulegri ráðningu á Robbie Keane sem næsta stjóra liðsins.
Keane hefur samkvæmt fréttum átt í viðræðum við Dermot Desmond, stærsta hluthafa Celtic, um starfið.
Andstaðan snýr fyrst og fremst að því að Keane stýrði Maccabi Tel Aviv í Ísrael er átökin á Gaza voru hafin
Í yfirlýsingu frá hópi sem kallar sig Celtic Fans for the Liberation of Palestine segir að ráðning Keane yrði mjög sundrandi meðal stuðningsmanna félagsins.
Alls eru 67 stuðningsmannahópar sagðir hafa skrifað undir yfirlýsinguna, þar á meðal Green Brigade, sem er mjög stór og þekktur stuðningsmannahópur.
Keane tók við Maccabi Tel Aviv árið 2023 og vann bæði deild og bikar með félaginu áður en hann hætti sumarið 2024.
