Katrín lýsir því í þættinum hvernig Helgi Vilhjálmsson, betur þekktur sem Helgi í Góu, hóf að áreita hana kynferðislega eftir að hann lánaði henni rúmlega fimm milljónir króna upp í útborgun á íbúð. Í yfirlýsingu til Stundarinnar biðst Helgi afsökunar á framferði sínu.
„Ef ég hefði bara vitað þetta þegar ég samþykkti, ég hefði frekar búið á götunni sko. Heldur en að ganga í gegnum þetta,“ segir hún í þættinum.
Að sögn Katrínar hófst áreitið árið 2018. Á þeim tíma vann Katrín í sjoppu í eigu Helga, Skalla, á Selfossi. Hún segir að hún hafi heyrt um að Helgi lánaði stundum starfsfólki upp í íbúðarkaup sem yrði síðan dregið mánaðarlega af launum þeirra. Henni var boðið að þiggja slíkt lán og samþykkti, en í kjölfarið hófst margra mánaða martröð.
Katrín segi að það sem hafi verið sérkennilegt í hennar tilfelli var að greiðslurnar bárust beint frá Helga, ekki fyrirtækinu. „Hann lánaði mér sem sagt persónulega og það var enginn samningur gerður heldur bara orð okkar á milli […] Þetta var bara munnlegt og ekki uppi á borðinu,“ segir hún.
Katrín Lóa segir að það hafi liðið vika frá því að hún tók við láninu og skrifaði undir kaupsamning þar til hann braut fyrst á henni.
Hún lýsir atvikinu og segist hafa verið á skrifstofu sjoppunnar að gera upp eftir vakt. Hún segir Helga hafa komið inn og sett hendur inn á bol hennar. „Og svo reif hann bolinn upp og ég var ekki í topp. Þetta voru þröngir vinnubolir og ég var bara á brjóstunum innanundir. Og þarna sat ég og var bara í sjokki,“ segir hún.
Bróðir Katrínar Lóu, Heimir Ingi, staðfestir frásögn hennar í samtali við Stundina, en hann var einnig að vinna á Skalla umrætt kvöld og hún sagði honum hvað hafði gerst strax sama kvöld.
„Á leiðinni heim úr vinnunni brotnaði hún niður og sagði frá. Ég var í sjokki yfir lýsingunum,“ segir hann.
Katrín lét einnig yfirmann sinn á Skalla, Helga Helgason, vita af því sem gerðist en áreitið hélt áfram.
Katrínu Lóu fannst hún föst í þessum aðstæðum þar sem hún var nýbúin að þiggja lán frá Helga.
„Hann var samt ekki að kaupa rétt á mér þótt hann hafi lánað mér pening,“ segir hún.
Áreitið hélt áfram og þegar hún reyndi að segja eitthvað við hann segir hún að hann hafi sagt: „Það má ekkert í dag.“
Katrín Lóa lýsir því hvernig hún hefur glímt við kvíða, þunglyndi og sjálfsvígshugsanir vegna málsins.
„Alltaf þegar ég kom heim á kvöldin þá brotnaði ég niður. Grét mig í svefn þegar mér tókst að sofna,“ segir hún.
„Mér finnst að fólk eigi að vita hvernig maðurinn er. Og ef það eru einhverjar þarna úti sem hafa lent í honum og hafa aldrei talað um það, þá kannski hjálpar þetta þeim,“ segir Katrín Lóa, aðspurð af hverju hún sé að stíga fram núna.
„[Ég er] líka að skila skömminni. Þetta er ekki mín skömm að bera og hann hefur ekki þurft að kljást við neinar afleiðingar. Það er ekki sanngjarnt. Ég held að það komi engin manneskja heil út úr þessu.“
Stundin sóttist eftir svörum frá Helga í Góu og fékk eftirfarandi yfirlýsingu: „Ég vil biðja Katrínu Lóu afsökunar. Ég gerði mistök í þessum samskiptum og sé eftir því.“
Katrín Lóa leitaði til lögreglu vegna málsins í október 2019 en málið var ekki rannsakað. Það er farið nánar út í ástæður þess og málið í ítarlegri grein á vef Stundarinnar.
Hægt er að horfa á þáttinn í heild sinni á Patreon-síðu Eigin Kvenna.
